Niderlandın KLM aviaşirkətinin iki təyyarəsi Sxiphol hava limanında toqquşub.
"Yeni Sabah" xəbər verir ki, bu barədə ANP agentliyi məlumat yayıb.
Bildirilib ki, hadisə zamanı təyyarələrdən biri hərəkətsiz vəziyyətdə olub, digəri isə yedəkləmə zamanı ona dəyib.
Təyyarələrin hansı səbəbdən toqquması ilə bağlı araşdırma aparılır. Mütəxəssislər hər iki təyyarənin texniki yoxlanışını həyata keçirirlər.
"Biz müvafiq orqanlarla birlikdə hadisənin səbəbini araşdırırıq və təyyarəni yenidən istismara qaytarmazdan əvvəl hərtərəfli yoxlayacağıq", - aviaşirkətin nümayəndəsi açıqlayıb.
Bildirilib ki, təyyarələrdən biri Afinaya yola düşməyə hazırlaşıb, digəri isə qəzadan bir müddət əvvəl Birminhemdən enib.
Hadisədən sonra hər iki təyyarənin sərnişinləri və ekipaj üzvləri qapıya qədər müşayiət olunub. Aviaşirkət bütün sərnişinlərin dərhal alternativ reyslərə yenidən bron edildiyini əmin edib.
Telegram kanalımız
