Rusiyanın Azərbaycan əleyhinə apardığı informasiya müharibəsinin yeni mərhələyə keçəcəyi ilə bağlı məlumatlar yayılıb. Mənbələrin bildirdiyinə görə, yaxın günlərdə Moskvanın Bakıya qarşı daha sərt və sistemli təbliğat kampaniyasına başlaması gözlənilir.
KONKRET.az xəbər verir ki, bu dəfə söhbət təkcə ayrı-ayrı ekspertlərin və ya mediada çıxış edən şəxslərin açıqlamalarından getmir. İddia olunur ki, Rusiya tərəfindən planlaşdırılan yeni mərhələdə məqsədli şəkildə hazırlanmış informasiya hücumları həyata keçiriləcək. Bu hücumlar həm bütövlükdə **Azərbaycan**a qarşı, həm də ölkə rəhbərliyinə yönəlmiş formada aparılacaq.
Məlumatlarda qeyd olunur ki, kampaniyanın əsas istiqaməti müxtəlif media resursları və sosial platformalar üzərindən rezonans doğuracaq materialların yayılması olacaq. Bu materialların məqsədi Azərbaycanla bağlı mənfi ictimai rəy formalaşdırmaq, ölkənin beynəlxalq imicinə zərər vurmaq və ictimai etimadı sarsıtmaqdır.
Mənbələrin sözlərinə görə, informasiya hücumları zamanı saxta iddialar, təhrif olunmuş faktlar və emosional manipulyasiya üsullarından geniş istifadə ediləcək. Xüsusilə, həssas siyasi və sosial mövzular üzərindən cəmiyyət daxilində çaşqınlıq yaratmaq əsas hədəflərdən biri olacaq.
Diqqət çəkən məqamlardan biri də kampaniyada tanınmış azərbaycanlı ailələrdən birinin Rusiyada yaşayan nümayəndəsinin iştirakının planlaşdırılmasıdır. Bildirilir ki, həmin şəxsdən Azərbaycan əleyhinə informasiya axınının gücləndirilməsi üçün istifadə edilə bilər. Məqsəd bu yolla yayılan materiallara “daxili mənbə” görüntüsü vermək və onların inandırıcılığını artırmaqdır.
Siyasi müşahidəçilərin fikrincə, bu cür addımlar regionda artan gərginlik fonunda informasiya təzyiqi vasitəsilə Azərbaycana təsir göstərmək cəhdidir. Xüsusilə son illərdə Bakının müstəqil siyasət yürütməsi və beynəlxalq mövqeyinin möhkəmlənməsi bəzi dairələri narahat edir.
Ekspertlər hesab edirlər ki, qarşıdakı dövrdə Azərbaycan mediası və ictimaiyyəti yayıla biləcək dezinformasiyalara qarşı daha diqqətli olmalı, rəsmi və etibarlı mənbələrə üstünlük verməlidir. İnformasiya təhlükəsizliyi məsələsi hazırkı mərhələdə milli təhlükəsizliyin əsas komponentlərindən biri kimi qiymətləndirilir.
Qeyd olunur ki, dövlət qurumları və müvafiq strukturlar vəziyyəti nəzarətdə saxlayır və mümkün informasiya təxribatlarının qarşısının alınması üçün qabaqlayıcı tədbirlər görür. Məqsəd ölkənin reputasiyasını qorumaq və ictimai sabitliyi təmin etməkdir.
Mənbə: Minval Politika
Natiq Səlim,
KONKRET.az
