Bundesver briqadasının (Almaniya Silahlı Qüvvələri) daimi yerləşdirilməsi üçün Litvada əsas düşərgəyə çevriləcək Rudninkai təlim poliqonuna dəmir yolu xəttinin tikintisi 30 milyon avroya başa gələcək. Bu barədə layihənin seçilmiş podratçısı olan dövlət müəssisəsi Lietuvos Gelezinkeliai (Litva Dəmir Yolları) açıqladı.
Bəyanatda deyilir: "30,2 milyon avro dəyərində qiymətləndirilən layihənin tamamlanması iki il səkkiz ay çəkəcək. Bu müddət ərzində əsas xəttdən Rudninkai təlim poliqonuna 8,6 km dəmir yolu xətti çəkiləcək".
Litva Ordusu Komandanlığının məlumatına görə, Rudninkai təlim poliqonuna dəmir yolu xəttinin tikintisi ən vacib hərbi mobillik layihələrindən biridir. Hərbi mobillik, qoşunların dövlət sərhədlərindən keçməsindəki bürokratik maneələri minimuma endirən bir sıra tədbirlər və hüquqi aktlara aiddir.
Əldə edilən razılığa əsasən, Almaniya NATO-nun şərq cinahını gücləndirmək çərçivəsində 2027-ci ilə qədər Bundesver briqadasından 4800 əsgər və 200 dəstək heyətini Litvaya daimi olaraq yerləşdirəcək. Bu briqada bir tank və mexanikləşdirilmiş piyada batalyonundan ibarət olacaq.
Əziz Mustafa
