Varşava İkinci Dünya müharibəsində dəymiş zərərin qiymətləndirilməsi üçün məlumat toplayır...
Polşa hökuməti İkinci Dünya müharibəsi illərində ölkəyə vurulmuş zərərə görə Rusiyaya qarşı mümkün reparasiya iddiası qaldırmaq məqsədilə məlumatların toplanmasına başlayıb.
Poliqon xəbər verir ki, bu barədə Nazirlər Kabinetinin sözçüsü Adam Szłapka açıqlama verib.
Sözçünün sözlərinə görə, hazırkı mərhələdə əsas məqsəd bütün itkilərin hərtərəfli və elmi əsaslarla araşdırılmasıdır. “Biz məlumatları toplayırıq”, deyə hökumət rəsmisi bildirib və vurğulayıb ki, söhbət tələsik siyasi qərardan deyil, dəqiq və genişmiqyaslı elmi tədqiqatdan gedir. Szłapka əlavə edib ki, əvvəlki hökumət, yəni Hüquq və Ədalət partiyasının təmsil olunduğu kabinet bu istiqamətdə sistemli iş aparmayıb.
Məsələ ilə bağlı daha əvvəl Financial Times qəzeti yazıb ki, Polşanın Baş naziri Donald Tusk müvafiq qurumlara müharibə dövründə ölkəyə dəymiş zərərin yenidən qiymətləndirilməsi tapşırığı verib. Bildirilir ki, bu məqsədlə Jan Karski Institute araşdırmalara cəlb olunub.
İnstitutun direktoru Bartosz Gondek açıqlamasında işlərin davam etdiyini təsdiqləyib, lakin arxiv materiallarına çıxışın məhdud olması səbəbindən prosesin çətinliklərlə müşayiət olunduğunu bildirib. Onun sözlərinə görə, zərərin obyektiv qiymətləndirilməsi üçün həm daxili, həm də xarici arxiv mənbələrinin araşdırılması vacibdir.
Qeyd edək ki, Polşa hakimiyyəti son illərdə İkinci Dünya müharibəsi ilə bağlı tarixi və hüquqi məsuliyyət məsələsini beynəlxalq müstəviyə çıxarmaq istiqamətində müxtəlif təşəbbüslərlə çıxış edib. Rəsmi Varşava hesab edir ki, müharibə nəticəsində ölkənin insan itkiləri, dağıdılmış infrastruktur və iqtisadi geriləmə ilə bağlı dəqiq və hüquqi əsaslandırılmış hesablamalar aparılmalıdır.
Poliqon.info
