Bu gün Özbəkistan Qeyri-Hökumət Qeyri-Kommersiya Təşkilatları Milli Assosiasiyasının Şurasının növbəti iclası keçirilib. Gündəliyin əsas məsələsi Assosiasiyanın idarəetmə orqanının tərkibinin formalaşdırılması və təşkilatın intellektual potensialının gücləndirilməsi olub.
QHT.az xəbər verir ki, iclasda Şura üzvləri irəli sürülmüş namizədləri ətraflı müzakirə edib və səsvermə keçiriblər. Səsvermənin nəticələrinə əsasən:
- Jo‘raboyev İbroximjon İlxomjon oğlu — Assosiasiya Şurası sədrinin birinci müavini vəzifəsinə;
- İsmailov Samandar Abdixakim oğlu — Assosiasiya Şurası sədrinin müavini vəzifəsinə yekdilliklə seçiliblər.
Qeyd edək ki, hər iki gənc kadr “El-yurt umidi” fondunun təqaüdçüləridir və xarici ölkələrin aparıcı ali təhsil müəssisələrində təhsil alıblar. Seçilmiş yeni rəhbərliyin üzərinə Assosiasiyanın fəaliyyətinin transformasiyası, QHT-lərin maraqlarının müdafiəsində yeni mexanizmlərin tətbiqi, eləcə də sosial tərəfdaşlığın genişləndirilməsi kimi prioritet vəzifələr qoyulub.
Şura üzvləri yeni tərkibin bilik və enerjisinin Özbəkistanda vətəndaş cəmiyyəti institutlarının daha da inkişafına xidmət edəcəyinə inam ifadə ediblər.
