“Kristal”ın Yasamalda fəaliyyət göstərən “Park Yasamal” layihəsi reklamlarında “Evini hissə-hissə al” modeli ilə faizsiz və kreditsiz mənzil sahibi olmaq imkanı vəd edir. Reklamda alıcı seçdiyi kvadratmetri rəsmi sənədləşdirə, əlavə sahə ala və yatırdığı vəsaiti illik 12% artımla geri ala bilər. Hətta ilkin ödənişin ƏDV hissəsi 30 gün ərzində geri qaytarılır.
Bizimesr.az araşdırmaları göstərir ki, bu iddialar həmişə real vəziyyətlə uyğun gəlmir və vətəndaşlar üçün ciddi maliyyə riskləri yarada bilər. “Park Yasamal”ın reklamında alıcı üçün təqdim olunan üstünlüklərə diqqət etmək lazımdır: İstədiyi kvadratmetri rəsmi sənədləşdirmək imkanı, hissə-hissə ödəniş zamanı faiz və aylıq öhdəlik olmaması və toplanan vəsaitin mənzil alınmasa digər variantlara yönləndirilməsi.
İlk baxışdan əla görünən bu təqdimat alıcıya “risksiz” və “tam şəffaf” model təsiri yaradır. Lakin praktikada vəziyyət fərqlidir və bir sıra vacib nüanslara diqqət etmək lazımdır:
Hissə-hissə ödənişin hüquqi statusu: Əslində reallıq budur ki, tikinti mərhələsində alınan kvadratmetr sahə faktiki olaraq alıcının tam mülkiyyətinə keçmir. Sənədləşmə yalnız mənzil tamamlandıqdan sonra mümkündür.
Qiymət artımı və inflyasiya: Reklamda sahənin bazar qiyməti ilə artacağı iddia olunur, amma bazar tez-tez dəyişir. Tikinti gecikməsi və bazarın ucuzlaşması alıcının real dəyərinə təsir edə bilər. Gizli xərclər – kommunal xidmətlər, sənədləşdirmə və əlavə təmir xərcləri reklamda göstərilmir, lakin ödənilməsi alıcının öhdəsinə düşə bilər.
ƏDV və illik 12% artım: Bu, yalnız şirkətin daxili qaydalarına uyğun tətbiq olunur və prosedur gecikə bilər. Vətəndaş üçün əsas maliyyə riskləri isə diqqətdən kənarda qalır. Bazar qiymətlərinin dəyişməsi yatırılan vəsaitin real dəyərini azalda, gizli xərclər isə alıcının büdcəsini artıra bilər.
Ekspertlər dəfələrlə bəyan edirlər ki, belə layihələrdə müqavilənin bütün şərtləri diqqətlə oxunmalı, mümkün gecikmələr və əlavə xərclər nəzərə alınmalıdır. “Park Yasamal” layihəsi reklam baxımından cəlbedici görünür və bunu özünün reklam verdiyi media qurumlarında yayır. Əslində isə risklər vətəndaşa açıq deyilməlidir.
Mənzil almaq istəyən vətəndaşlar yalnız reklamın cazibəsinə aldanmamalı, müqaviləni diqqətlə öyrənməli və lazım gələrsə hüquqi məsləhət almalıdırlar. Bu, həm maliyyə təhlükəsizliyini təmin edir, həm də gözlənilməz sürprizlərin qarşısını alır.
Mənbə: Bizimesr.az
