ABŞ-də Vilson adlı cinayətkar qadınlar arasında populyar imiş-MARAQLI FAKTLAR » AzadMedia.az

ABŞ-də “Deadpool Killer” ləqəbi ilə tanınan Wade Wilsonun hekayəsi təkcə törətdiyi amansız cinayətlərə görə deyil, həm də onun ətrafında formalaşan qəribə populyarlıq dalğasına görə ölkədə geniş rezonans doğurub. Bu barədə New York Post məlumat yayıb.

31 yaşlı Florida sakini 2019-cu ilin oktyabrında iki qadını qətlə yetirdiyini etiraf edib. Lakin gözlənildiyi kimi ümumi qınaqla üzləşmək əvəzinə, o, qadınlar arasında fanat kütləsi qazanıb. Ona məktublar yazılıb, pul göndərilib, hətta bəzi şəxslər onun şərəfinə tatu etdiriblər.

Bu fenomen Paramount+ platformasında yayımlanan “Handsome Devil: Charming Killer” sənədli filmində araşdırılıb. Film məhkum edilmiş ikiqat qatilin necə kult fiqura çevrildiyini təhlil edir.
Qətllər
Hadisə 7 oktyabr 2019-cu ildə baş verib. Wilson barlardan birində tanış olduğu 35 yaşlı Kristin Meltonu boğaraq öldürüb. Həmin gün daha sonra o, 43 yaşlı Dayan Ruisə hücum edərək onu döyüb, boğub və avtomobili ilə üzərindən keçib.
Wilson ertəsi gün atasına zəng edərək cinayətləri etiraf etdikdən sonra saxlanılıb.

2024-cü ilin iyununda məhkəmə onu hər iki qətldə təqsirli bilib. Avqust ayında isə ölüm cəzasına məhkum edilib.

Viral şöhrət

Wilsonun məşhurluğu həbsxanada çəkilmiş fotosunun sosial şəbəkələrdə yayılmasından sonra sürətlə artıb. Üzü və boynu çoxsaylı tatu ilə örtülü olan Wilson – o cümlədən svastika və tikişli ağız təsviri – internetdə böyük diqqət çəkib.

TikTok və digər platformalarda özlərini “Wade’s Wives” adlandıran qadın fanatlar qrupu formalaşıb. Onlar məhkuma yüzlərlə məktub, intim fotolar və pul göndəriblər. Sənədli film müəlliflərinin məlumatına görə, ianələrin ümumi məbləği təxminən 100 min dollar təşkil edib. Bildirilir ki, Wilson bu vəsaiti hüquqi xərclərə deyil, həbsxanada ərzaq və kiçik əşyaların alınmasına sərf edib.

Bəzi pərəstişkarları onun məhkəmə iclasları üçün geyim və tatu örtmək məqsədilə makiyaj vasitələri də alıblar. Lakin o, çox vaxt məhkəməyə tatu ilə çıxaraq prosesi media şousuna çevirib.

Niyə belə oldu?

Kriminoloqlar bildirirlər ki, bu tip cazibə nadir deyil. Xüsusilə travma yaşamış bəzi qadınlar təhlükəli kişilərə meyilli ola bilirlər. Həbsxana izolyasiyası isə müəyyən təhlükəsizlik illüziyası yaradır — ünsiyyət mümkündür, lakin fiziki təhlükə məhduddur.

Wilsonun keçmiş partnyorları onun xarizmasına aludə olduqlarını və onu “düzəldə biləcəklərinə” inandıqlarını etiraf ediblər. Lakin yaxın çevrəsi onun kəskin əhval dəyişiklikləri yaşadığını, cazibədar davranışdan təhdidkar davranışa keçdiyini bildirib.

Rəsmilərin reaksiyası

Florida prokurorları Wilsona göstərilən dəstək dalğasını kəskin tənqid ediblər. Ştat prokuroru 34 illik karyerasında daha “şər” bir cinayətkarla rastlaşmadığını və cəmiyyətin müəyyən hissəsinin ona dəstək verməsindən şoka düşdüyünü bildirib.

Lee dairəsi şerif idarəsinin məlumatına görə, Wilson hökm oxunduqdan sonrakı bir ay ərzində təxminən 4 min mesaj, onlarla məktub və yüzlərlə foto alıb. Bəzi materiallar uyğun olmayan məzmun səbəbilə qəbul edilməyib.

Hazırda Wilson təcrid olunmuş şəraitdə ölüm kamerasında saxlanılır və hökmündən apellyasiya şikayəti verib. Sənədli filmə görə, vaxtilə internetdə romantikləşdirilən obrazı artıq əvvəlki təsirini itirib — son həbsxana fotolarında o, şişkin və baxımsız görünür.

“Deadpool Killer” hadisəsi ekstremal cinayətlərin necə internet kultuna çevrilə biləcəyinin sarsıdıcı nümunəsi kimi qiymətləndirilir.