Paris, 16 fevral, AZƏRTAC
Fransa prezidenti Emmanuel Makron ilə sabiq daxili işlər naziri, hazırda prezidentliyə namizədliyini irəli sürmüş Brüno Rötayo arasında münasibətlər gərginləşib. Tərəflər hüquqi dövlət prinsipi və mümkün konstitusiya dəyişikliyi məsələsi ətrafında kəskin bəyanatlarla çıxış ediblər.
AZƏRTAC xəbər verir ki, Brüno Rötayo təhlükəsizlik qanunvericiliyinin sərtləşdirilməsi və immiqrasiyaya qarşı mübarizənin gücləndirilməsi məqsədilə Konstitusiyaya dəyişiklik edilməsini təklif edib. “Hüquqi dövlətin müəyyən sapmaları var. Əgər buna son qoymaq istəyiriksə, konstitusiyanı dəyişməliyik”, – deyə o bildirib.
Bu açıqlamalar dövlət başçısının sərt reaksiyasına səbəb olub. Emmanuel Makron “Radio J” radiosuna müsahibəsində institusional əks-tarazlıq mexanizmlərinin zəiflədilməsinə qarşı xəbərdarlıq edib: “Bu çox təhlükəlidir, çünki respublikanı zəiflədir. Konstitusiyamızı sarsıtmaq və bütün problemlərin mənbəyini orada axtarmaq olmaz”.
Bununla belə, Makron bəzi qaydaların dəyişdirilə biləcəyini istisna etməyib, lakin həm də ehtiyatlı olmağa çağırıb.
Brüno Rötayo isə X sosial şəbəkəsində dərhal cavab verərək, prezidentin fəaliyyətini tənqid edib: “Uğursuz islahatlar keçirən Emmanuel Makron 2027-ci ildən sonra heç nəyin dəyişməsini istəmir”.
O, daha da irəli gedərək bildirib ki, əsas vəzifələrə dostlarını təyin edən və hüquqi status-kvonun qorunmasına çağıran Makron hərəkətsiz Fransanın vəkilinə çevrilib. Rötayo bununla hazırkı dövlət hesabları naziri Ameli dö Monşalənin Hesablama Palatasının prezidenti vəzifəsinə təyin olunmasına işarə edib.
Makron ilə Rötayo arasındakı bu polemika ilk deyil və qarşıdan gələn prezident seçkiləri ərəfəsində sağ və mərkəzçi düşərgədə institusional islahatlar və miqrasiya məsələləri ətrafında artan gərginliyin göstəricisi kimi qiymətləndirilir.
