WSJ: Pentaqon “Anthropic” şirkətinin Claude modelini məxfi əməliyyatda tətbiq edib...
Poliqon xəbər verir ki, ABŞ-nin hərbi qurumları Venesuela prezidenti Nicolas Maduroya qarşı həyata keçirilən əməliyyatın planlaşdırılması zamanı “Anthropic” şirkətinin hazırladığı Claude adlı süni intellekt modelindən istifadə edib. Bu barədə The Wall Street Journal qəzeti yazıb.
Məlumata görə, Pentaqon əməliyyatın analitik və planlaşdırma mərhələsində Claude modelinin imkanlarından yararlanıb. ABŞ Müdafiə Nazirliyi məsələ ilə bağlı rəsmi şərh verməkdən imtina edib. Nəşr iddia edir ki, “Anthropic”in alətləri artıq bir müddətdir ABŞ dövlət strukturları tərəfindən geniş şəkildə istifadə olunur və şirkət Vaşinqtonun “məxfi əməliyyatlarda” cəlb etdiyi ilk süni intellekt tərtibatçısı olub.
Bununla yanaşı, Anthropic şirkətinin istifadə qaydalarına əsasən, Claude modelinin “zorakılığa yardım, silah hazırlanması və ya müşahidə fəaliyyətinin təşkili” məqsədilə tətbiqi qadağandır. Şirkət özü də konkret əməliyyatla bağlı açıqlama verməyib, lakin bildirib ki, onların süni intellekt modellərindən istənilən istifadə şirkətin müəyyən etdiyi qaydalara uyğun olmalıdır.
Mənbənin yazdığına görə, əməliyyatda yalnız Claude deyil, digər süni intellekt sistemləri də iştirak edib. Bu texnologiyalar böyük həcmli sənədlərin operativ şəkildə təhlili və xülasələrinin hazırlanması, kəşfiyyat məlumatlarının emalı, eləcə də avtonom pilotsuz uçuş aparatlarının idarə olunması kimi funksiyalarda tətbiq oluna bilər.
Ekspertlər hesab edirlər ki, süni intellektin hərbi və xüsusi əməliyyatlarda istifadəsi yeni mərhələyə qədəm qoyur. Belə texnologiyalar qərar qəbuletmə prosesini sürətləndirir, risklərin modelləşdirilməsinə imkan yaradır və əməliyyat ssenarilərinin əvvəlcədən simulyasiyasını təmin edir. Bununla belə, etik və hüquqi çərçivə məsələləri, xüsusilə kommersiya məqsədli hazırlanmış modellərin hərbi əməliyyatlarda tətbiqi ilə bağlı suallar açıq qalır.
Qeyd edək ki, son illər ABŞ-nin müdafiə və təhlükəsizlik strukturları süni intellekt əsaslı sistemlərin inteqrasiyasını sürətləndirib. Bu tendensiya həm informasiya müharibəsi, həm də real döyüş əməliyyatlarının planlaşdırılması və icrası sahəsində texnologiyanın rolunu artırır.
Poliqon.info
