Prezident Vladimir Zelenski Milli Təhlükəsizlik və Müdafiə Şurasının Rusiyanın “kölgə donanmasına” məxsus 91 tankerə qarşı sanksiyalar tətbiq etmək qərarını həyata keçirən fərman imzalayıb.
Editor.az xəbər verir ki, bu barədə 12 fevralda Prezident Aparatının mətbuat xidməti məlumat verib. Bu gəmilər Novorossiysk, Ust-Luqa və Primorsk da daxil olmaqla Rusiya limanlarından neft və neft məhsulları daşıyıb. Sanksiyalardan yayınmaq üçün tankerlər təxminən 20 ölkənin bayraqlarını daşıyıblar. Prezident Aparatının məlumatına görə, onlardan yalnız biri Rusiya, digərləri isə Panama, Liberiya, Kamerun, Barbados, Marşal Adaları, Honkonq, Syerra-Leone, Tonqa, Palau, Qvineya, Komor, Baham adaları, İndoneziya, Malavi, Qvineya-Bisau, Cibuti, Qayana və Esvatininin bayraqlarını daşıyıblar. “Ukrayna bu ölkələrlə müvafiq məlumatları paylaşacaq və tərəfdaşlarla birlikdə onların yurisdiksiyalarında sanksiyaları daha da sinxronlaşdırmaq üçün işləyəcək”, – Prezident Aparatının açıqlamasında bildirilir.
Siyahıdakı iyirmi yeddi gəmi artıq ABŞ, Böyük Britaniya, İsveçrə və Aİ tərəfindən sanksiyalara məruz qalıb. Prezident Administrasiyası əlavə edib ki, qalan 64 gəmiyə sanksiyaların tətbiqi üzərində iş davam edəcək.
//Samir Qurbanov, Editor.az
