Müasir dövrdə dövlətin iqtisadi qüdrəti təkcə dövlət sektorunun səmərəliliyi ilə deyil, həm də özəl sektorun texnoloji transformasiyaya nə dərəcədə sürətlə adaptasiya olması ilə ölçülür. Azərbaycan Respublikasının Prezidenti cənab İlham Əliyevin elan etdiyi “Azərbaycanın yeni rəqəmsal arxitekturası” vizyonu ölkənin iqtisadi həyatında köklü dəyişiklikləri nəzərdə tutur.
Bu strateji çərçivədə özəl sektorun rəqəmsallaşması və innovativ biznes mühitinin formalaşdırılması milli inkişafın əsas prioritetlərindən biri kimi müəyyən edilmişdir. 2026-cı ilin fevralında keçirilən strateji müşavirədə dövlət başçısının xüsusi vurğuladığı kimi, rəqəmsallaşma təkcə dövlət qurumları ilə məhdudlaşmamalı, eyni zamanda özəl sektoru da tam əhatə etməli, bunun üçün isə təsirli dəstək mexanizmləri işlənməlidir.
Azərbaycan iqtisadiyyatının daxili və xarici rəqabətədavamlılığının artırılması rəqəmsal ekosistemin bütün iştirakçılarını əhatə etməsini tələb edir. Ənənəvi biznes modelləri artıq qlobal rəqabətə tab gətirə bilmir. Süni intellektin tətbiqi, data əsaslı idarəetmə və rəqəmsal infrastrukturun inkişafı ölkələrin gələcək taleyini müəyyən edir. Bu baxımdan, özəl sektorun bu prosesden kənarda qalması iqtisadi artımın ləngiməsinə səbəb ola bilər.
Dövlət tərəfindən həyata keçirilən islahatlar özəl sektorun qarşısında yeni imkanlar açır. Rəqəmsal transformasiya biznes subyektləri üçün əməliyyat xərclərinin azaldılması, istehsal proseslərinin avtomatlaşdırılması və müştəri məmnuniyyətinin artırılması deməkdir. Lakin bu keçid biznes qurumlarından ciddi investisiya və kadr hazırlığı tələb edir. Məhz burada dövlətin təşviq və dəstək rolu ön plana çıxır.
Prezident İlham Əliyev dövlət qurumlarında süni intellekt agentlərinin tətbiqini zəruri hesab etdiyi kimi, eyni yanaşmanın özəl sektorda da tətbiqini təşviq edir. Sİ agentləri özəl sektorda bazar analizindən tutmuş, təchizat zəncirinin idarə edilməsinə qədər bütün sahələrdə inqilabi dəyişikliklər edə bilər. Dövlət dəstəyi ilə süni intellekt həllərinin biznesə inteqrasiyası Azərbaycan şirkətlərinin beynəlxalq bazarlarda "ağıllı rəqabət" aparmasına şərait yaradır.
Özəl sektorun rəqəmsallaşması həm də kiber-təhdidlərin artması deməkdir. Prezidentin çıxışında qeyd etdiyi "aqressiv kiberhücumlar" həm dövlət, həm də özəl müəssisələr üçün ciddi riskdir. Milli Kibertəhlükəsizlik Mərkəzi tərəfindən özəl sektora göstərilən metodoloji dəstək və kiber-gigiyena standartlarının müəyyən edilməsi biznesin intellektual mülkiyyətini və müştəri məlumatlarını qoruyur.
Azərbaycanın coğrafi mövqeyindən istifadə edərək regional fiber-optik qovşağa çevrilməsi özəl sektor üçün qlobal bağlantı imkanları yaradır. ABŞ və digər ölkələrlə imzalanmış "Strateji Tərəfdaşlıq Xartiyası" yerli şirkətlərin qlobal texnoloji nəhənglərlə birbaşa əməkdaşlığına yol açır. Bu, yerli biznesin qlobal dəyər zəncirinə inteqrasiyası üçün tarixi fürsətdir.
Azərbaycanın yeni rəqəmsal arxitekturası özəl sektoru ölkənin iqtisadi tərəqqisinin əsas lokomotivi kimi görür. Prezident İlham Əliyevin uzaqgörən rəhbərliyi ilə qurulan rəqəmsal ekosistem, özəl sektor üçün təkcə infrastruktur deyil, həm də strateji inkişaf platformasıdır. Dövlət dəstəyi mexanizmləri, innovativ biznes mühitinin təşviqi və süni intellektin tətbiqi Azərbaycanı regionun texnoloji liderinə çevirir.
Özəl sektorun rəqəmsallaşması prosesi dövlət-biznes tərəfdaşlığının yeni və daha səmərəli modelini ortaya qoyur. Bu yolun sonunda biz daha şəffaf, daha proaktiv və daha rəqabətədavamlı bir Azərbaycan iqtisadiyyatını görürük. Rəqəmsal ekosistemin güclənməsi hər bir sahibkarın və hər bir vətəndaşın rifahına xidmət edən uzunmüddətli dayanıqlı inkişafın təminatıdır.
Xəyalə VEYİSOVA,
Səttar Bəhlulzadə adına Xarici Dillər Təmayüllü Gimnaziyanın direktoru
