“Məhkum edilmiş maliyyəçi və cinsi cinayətkar Ceffri Epşteyn heyrətamiz səviyyədə dost və tərəfdaşlardan ibarət şəbəkə qurmuşdu. ABŞ Ədliyyə Nazirliyi tərəfindən dərc edilən təxminən üç milyon səhifəlik sənədlər bu əlaqələrin yeni və diqqətçəkən detallarını üzə çıxarıb. Nəticədə bir sıra yüksək vəzifəli şəxslər vəzifələrini tərk etməyə məcbur qalıb. Bir vaxtlar Fransanın mədəniyyət naziri olmuş Cek Lanq şənbə günü Parisdəki nüfuzlu mədəniyyət müəssisəsi – Ərəb Dünyası İnstitutunun direktoru vəzifəsindən istefa verəcəyini açıqlayıb. Bu qərar Fransa hakimiyyət orqanlarının onun və ailəsinin Epşteynlə mümkün maliyyə əlaqələrini araşdırmağa başlamasından sonra verilib”.
“Cebheinfo.az” xəbər verir ki, bunu “ The New York Times” yazıb.
Norveçin İordaniya və İraqdakı sabiq səfiri Mona Juul da əri ilə Epşteyn arasında maliyyə əməliyyatlarının üzə çıxmasından sonra istefa verib. Slovakiyanın Baş naziri Robert Fikonun milli təhlükəsizlik müşaviri Miroslav Layçak isə Epşteynlə gənc qadınlar barədə zarafatlaşdıqları iddia edilən elektron məktubların ictimaiyyətə açıqlanmasından sonra vəzifəsini tərk edib. Fransa Prezidenti Emmanuel Makron bu həftə Epşteynin geniş əlaqə şəbəkəsinə toxunaraq bildirib:
“Onun çox geniş bir sistemə sahib olduğu aydındır. Bu, bir çox sui-qəsd nəzəriyyələrini də gücləndirir”.
“Epşteyn işi” Panama Sənədləri qalmaqalı ilə müqayisə edilir. Skandinaviyadan Cənubi Asiyaya qədər müxtəlif ölkələrdə imtiyazlı siyasi və sosial dairələr bu iş çərçivəsində diqqət mərkəzinə düşüb. Bir çox hallarda ittihamlar vəzifələrin itirilməsi, nüfuzun zədələnməsi və məhkəmə təhdidləri ilə nəticələnib. Sənədlərdə Cek Lanqın adı 600 dəfədən çox çəkilir. Bildirilir ki, Lanq və Epşteyn rejissor Vudi Allen vasitəsilə tanış olublar.
Fransanın “Mediapart” araşdırma saytının məlumatına görə, Epşteyn Lanqın qızı Karolin ilə birlikdə ofşor fonda sahib olub. Lanq isə bu fondun perspektivli sənətçiləri dəstəkləmək məqsədi ilə yaradıldığını bildirib.
Həmçinin iddia olunur ki, Epşteyn vəsiyyətnaməsində Karolinə 5 milyon dollar vəsait ayırıb. Fransanın Milli Maliyyə Prokurorluğu Lanq və qızı barəsində vergi fırıldaqçılığından əldə edilən çirkli pulların yuyulması maddəsi üzrə ilkin istintaqa başladığını açıqlayıb.
