Aşağı palata Trampın fövqəladə vəziyyət rejiminə əsaslanan ticarət tədbirlərini dəstəkləməyib...
Poliqon xəbər verir ki, ABŞ Nümayəndələr Palatası prezident Donald Trampın Kanadadan idxal olunan mallara tətbiq etdiyi rüsumları dəstəkləməyib. Qanunvericilər fövqəladə vəziyyət rejiminin ləğvini nəzərdə tutan qətnamənin lehinə 219, əleyhinə isə 211 səs veriblər. Məhz həmin fövqəladə vəziyyət rejimi Kanada mallarına qarşı ticarət tədbirlərinin hüquqi əsası kimi istifadə olunurdu.
Nümayəndələr Palatasında çoxluq Respublikaçılar Partiyasının əlində olsa da, bu səsvermə prezidentin mövqeyinə qarşı nadir etiraz nümunəsi kimi qiymətləndirilir. Reuters agentliyinin məlumatına görə, sənəd indi baxılması üçün Senata göndəriləcək. Agentlik ehtimal edir ki, yuxarı palata da qətnaməni dəstəkləyə bilər. Lakin senatorların prezidentin veto hüququnu aşmaq üçün kifayət qədər səs toplayıb-toplamayacağı hələlik sual altındadır.
Donald Tramp isə rüsumlara qarşı çıxan respublikaçıları kəskin tənqid edib. O bildirib ki, ticarət tariflərinə qarşı mövqe sərgiləyən partiya üzvləri seçkilərdə dəstək itirə bilərlər. Prezident hətta xəbərdarlıq edib ki, bu mövqe onların partiyadaxili ilkin seçkilərdə belə səs itirməsinə səbəb ola bilər. “Rüsumlar bizə iqtisadi və milli təhlükəsizlik qazandırıb və heç bir respublikaçı bu imtiyazın məhv edilməsinə görə məsuliyyət daşımamalıdır”, – deyə Tramp Truth Social sosial şəbəkəsində yazıb.
Qeyd edək ki, qanunvericilərin etiraz etdiyi fövqəladə vəziyyət rejimi 2025-ci ilin fevralında elan olunmuşdu. Prezident həmin qərarını narkotik qaçaqmalçılığı və qeyri-qanuni miqrasiya ilə mübarizə zərurəti ilə əsaslandırmışdı. Bu qərar ABŞ hakimiyyətinə Kanadadan idxal edilən məhsullara 10 faiz həcmində rüsum tətbiq etmək imkanı vermişdi.
Müşahidəçilər hesab edirlər ki, bu məsələ Respublikaçılar Partiyası daxilində iqtisadi siyasət və proteksionizmə münasibət baxımından fikir ayrılıqlarını daha da dərinləşdirə bilər. Eyni zamanda, ABŞ-nin ən böyük ticarət tərəfdaşlarından biri olan Kanada ilə münasibətlərə təsiri də diqqət mərkəzindədir.
Poliqon.info
