Ankara Yaxın Şərqdə güc balansının kəskin dəyişməsini istəmir...
Regionda nüvə silahının (NS) meydana çıxması halında Türkiyə nüvə yarışına qoşulmağa məcbur qala bilər.
Poliqon xəbər verir ki, bu barədə Türkiyənin xarici işlər naziri Hakan Fidan CNN Türk telekanalının efirində çıxışı zamanı İranın nüvə silahı əldə etməsi ehtimalını şərh edərkən bildirib.
Nazirin sözlərinə görə, Ankara bölgədə mövcud güc balansını poza biləcək kəskin və dramatik dəyişikliklərin baş verməsində maraqlı deyil.
“Açığı, regionda hazırkı balansı poza biləcək dramatik dəyişiklikləri görmək istəmirik. Məsələn, İranla problemləri olan ölkələr nüvə silahına sahib olmağa can atacaqlar. Bu halda isə bizim də istəmədən həmin yarışa qoşulmağımız ehtimalı yaranacaq”, deyə Hakan Fidan vurğulayıb.
Eyni zamanda, Türkiyənin nüvə silahına sahib olmaq istəyib-istəmədiyi ilə bağlı birbaşa suala nazir konkret cavab verməyib. O, bu mövzuda spekulyasiyalardan yayınaraq əsas diqqətin regional sabitliyin qorunmasına yönəldilməli olduğunu bildirib.
Xatırladaq ki, yanvar ayında The New York Times qəzeti Qərb kəşfiyyat xidmətlərinə istinadən yazmışdı ki, İranın nüvə silahı yaratdığına dair sübutlar aşkar edilməyib. Nəşrin məlumatına görə, kəşfiyyat orqanları Tehranın uranı silah səviyyəsinədək zənginləşdirdiyini və ya nüvə döyüş başlıqları hazırlamaq istiqamətində real addımlar atdığını göstərən əlamətlər tapmayıb.
Mütəxəssislər hesab edirlər ki, Yaxın Şərqdə nüvə silahının yayılması riski təkcə regional deyil, qlobal təhlükəsizlik üçün də ciddi nəticələr doğura bilər. Türkiyənin bu mövqeyi isə Ankaranın öz təhlükəsizliyini regional proseslərdən kənarda görmədiyini və balansın pozulacağı təqdirdə sərt qərarlar qəbul edə biləcəyini göstərir.
Poliqon.info
