Birləşmiş Ərəb Əmirlikləri (BƏƏ) Turizm Şurası 2026-cı ilin ilk iclasında "Dünyanın Ən Sərin Qışı" kampaniyasının 12,5 milyard dirhəm rekord gəlirlə uğurla başa çatdığını elan edib və yeni dövrün strateji istiqamətini müəyyənləşdirib.
Hafta.az yazır ki, BƏƏ-nin İqtisadiyyat naziri və Turizm Şurasının sədri Abdulla bin Touq əl-Mərrinin sədrliyi ilə keçirilən şura, ölkənin qlobal turizmdə liderliyini möhkəmləndirmək üçün 2026-cı il proqnozlarını bölüşüb. İclasda BƏƏ-nin yeddi əmirliyini əhatə edən inteqrasiya olunmuş turizm modelinin uğuru və iqtisadi artıma verdiyi töhfə vurğulanıb.
"Dünyanın Ən Sərin Qışı" kampaniyasının altıncı buraxılışı BƏƏ turizm tarixində ən uğurlu dövrlərdən birini qeyd edib. Altı həftəlik müddət ərzində otel gəlirləri 12,5 milyard dirhəm (təxminən 3,4 milyard dollar) çatıb, ölkə daxilindəki yaşayış müəssisələri isə 5 milyondan çox qonağı qəbul edib. Kampaniya zamanı otellərin doluluq nisbəti qlobal miqyasda 84 faizə çatıb. Nazir Bin Touq bildirib ki, bu nailiyyət BƏƏ Turizm Strategiyasının 2031-ci il hədəfləri ilə tam uyğundur və turizmin ÜDM-dəki payını 17 faizə çatdırmaq üçün vacib addımdır.
Şura 2026-cı il ərzində yeddi əmirliyin turizm potensialını vahid milli kimlik altında birləşdirməyə diqqət yetirəcək. Yeni planlaşdırma dövrü çimərlik kurortlarından və macəra turizmindən tutmuş mədəni irs yerlərinə və müasir əyləncə mərkəzlərinə qədər geniş çeşiddə məkanlarda "sorunsuz ziyarətçi təcrübəsi" təklif etməyi hədəfləyir.
Şura məlumatlara əsaslanan marketinq strategiyalarına üstünlük verəcək və Avropa, Asiya və Körfəz Əməkdaşlıq Şurası (KƏŞ) ölkələrindən yüksək dəyərli turist axınını artırmağı hədəfləyir. Bu kontekstdə qlobal aviaşirkətlər və beynəlxalq səyahət platformaları ilə əməkdaşlıq genişləndiriləcək.
BƏƏ-nin qeyri-neft gəlirlərini şaxələndirmək hədəflərinin mərkəzində olan turizm sektoru 2026-cı ildə yeni investisiyalarla dəstəklənəcək. Şura yerli sahibkarları və startap layihələrini turizm ekosisteminə inteqrasiya etməklə innovativ modellər hazırlamağa davam edəcək. Nazir Bin Tuq bildirib ki, BƏƏ dünya səviyyəli infrastrukturu və unikal təcrübələri ilə qlobal rəqabət qabiliyyətini qoruyub saxlayacaq. Ölkə 2026-cı il ərzində "Milli Turizm Kimliyi"nin təqdimatı ilə böyük qlobal sərgi və turizm yarmarkalarında təmsil olunacaq.
