Bizimyol saytından əldə olunan məlumata görə, ain.az məlumat yayır.
Böyük Britaniyanın baş naziri və Leyboristlər Partiyasının lideri Keir Starmer partiya üzərində nəzarəti yenidən bərpa etmək uğrunda mübarizə aparır. Buna səbəb onun ən yaxın müşaviri və aparat rəhbəri Morgan MakSvini (Morgan McSweeney)nin istefasıdır. İstefa ABŞ-a səfir təyin edilən Peter Mandelson ətrafında yaranmış qalmaqal fonunda baş verib.
Bizimyol.info xəbər verir ki, bir neçə gün davam edən təzyiqlərdən sonra MakSvini bazar günü verdiyi açıqlamada Mandelsonun Vaşinqtona göndərilməsi ilə bağlı verdiyi məsləhətə görə “tam məsuliyyəti” üzərinə götürdüyünü bildirib. O etiraf edib ki, Mandelsonun Jeffrey Epstein ilə davam edən əlaqələri Leyboristlər Partiyasına və ümumilikdə siyasətə olan inamı sarsıdıb.
Starmerin müttəfiqləri hesab edir ki, partiya daxilində ciddi narazılıq doğuran və son illərin ən nüfuzlu fiqurlarından sayılan MakSviniyin gedişi deputatlar arasında artan qəzəbi yumşalda və mümkün daxili rəqibləri zəiflədə bilər. Lakin Starmerin hakimiyyətə yüksəlişinin əsas memarlarından biri hesab olunan şəxsin itirilməsi baş nazir üçün ciddi zərbə kimi qiymətləndirilir. İndi diqqət bir daha Mandelsonun səfir təyinatı qərarına yönəlib.
Leyborist Partiyasının yüksək vəzifəli mənbələri bildiriblər ki, MakSviniyin istefası Starmeri qarşıdan gələn mühüm siyasi və seçki sınaqları ərəfəsində müdafiəsiz qoyub. Ayın sonuna planlaşdırılan Gorton və Denton ara seçkiləri onun siyasi gələcəyi üçün həlledici ola bilər.
Partiya daxilində bəzi deputatlar açıq şəkildə bildiriblər ki, məsuliyyət sonda baş nazirin üzərinə düşür. Onların fikrincə, bu istefa Starmerə sadəcə bir qədər vaxt qazandırıb.
Gözlənilir ki, yaxın günlərdə yüz minlərlə sənəd, o cümlədən Mandelson, Baş nazirlik (No 10) və nazirlər arasında olan şəxsi yazışmalar açıqlansın. Mənbələr iddia edir ki, bu sənədlər Mandelsonun təyinatının reputasiya baxımından ciddi risk daşıdığı barədə əvvəlcədən xəbərdarlıqlar edildiyini göstərəcək.
MakSvini istefa bəyanatında bildirib ki, dövlət təyinatlarının yoxlanılması mexanizmi əsaslı şəkildə yenilənməlidir və bu hadisə sadəcə simvolik addım olaraq qalmamalıdır.
MakSviniyin gedişindən sonra onun müavinləri Jill Cuthbertson və Vidhya Alakeson müvəqqəti aparat rəhbərləri təyin ediliblər.
Müxalif Mühafizəkarlar Partiyasının lideri Kemi Badenoç isə Starmeri məsuliyyətdən yayınmaqda ittiham edərək bildirib ki, baş nazir öz yanlış qərarlarına görə cavabdehlik daşımalıdır.
Qadir, Bizimyol.info
Hadisənin gedişatını izləmək üçün ain.az saytında ən son yeniliklərə baxın.
