Rusiya Silahlı Qüvvələrinin Baş Kəşfiyyat İdarəsinin rəis müavini general-leytenant Vladimir Alekseyevə qarşı sui-qəsd cəhdində şübhəli bilinən Lyubomir Korba Dubaydan ekstradisiya edildikdən sonra Moskvada həbs olunub..
APA-nın Moskva bürosu xəbər verir ki, ona qarşı hüquq-mühafizə orqanı əməkdaşını öldürməyə cəhd ittihamı elan olunub.
Kremlin rəsmi nümayəndəsi Dmitri Peskov isə bildirib ki, Rusiya Prezidenti Vladimir Putin dünən gecə Birləşmiş Ərəb Əmirliklərinin (BƏƏ) Prezidenti Şeyx Məhəmməd bin Zayed Əl Nəhyanla telefonla danışıb. O, Vladimir Putinin Rusiya Silahlı Qüvvələrinin Baş Kəşfiyyat İdarəsinin rəis müavini general Vladimir Alekseyevə sui-qəsd cəhdində şübhəli bilinən Lyubomir Korbanın saxlanılmasında BƏƏ tərəfinin köməyinə görə Əl Nəhyana təşəkkür etdiyini söyləyib.
Qeyd edək ki, Rusiya İstintaq Komitəsi generala sui-qəsddə şübhəli bilinən üç nəfərin müəyyən edildiyini açıqlayıb. Onlardan Viktor Vasin Moskva vilayətində saxlanılıb. Şübhəlilərdən Zinaida Serebritskayanın isə artıq Ukraynaya qaçdığı bildirilir. Hazırda onun federal və beynəlxalq axtarışa verilməsi planlaşdırılır.
İstintaqla müəyyən olunub ki, Zinaida Serebritskaya general Vladimir Alekseyevlə eyni binada, 26-cı mərtəbədə mənzil kirayəyə götürüb.
***
Rusiya Silahlı Qüvvələrinin Baş Kəşfiyyat İdarəsinin rəis müavini general-leytenant Vladimir Alekseyevə qarşı sui-qəsd cəhdində iştirak edən üç şəxs müəyyən edilib.
APA-nın Moskva bürosu xəbər verir ki, bunu Rusiya Federasiyası İstintaq Komitəsinin rəsmi nümayəndəsi Svetlana Petrenko bildirib.
Rusiya Federasiyası İstintaq Komitəsi Rusiya Müdafiə Nazirliyinin general-leytenantı Vladimir Alekseyevə qarşı sui-qəsd cəhdi ilə bağlı Rusiya Cinayət Məcəlləsinin 30-cu maddəsinin 3-cü hissəsi, 105-ci maddəsinin 1-ci hissəsi (qəsdən adam öldürməyə cəhd), Rusiya Cinayət Məcəlləsinin 222-ci maddəsinin 1-ci hissəsi (odlu silahların qanunsuz dövriyyəsi) və Rusiya Cinayət Məcəlləsinin 317-ci maddəsi (hərbçinin həyatına sui-qəsd) ilə cinayət işini araşdırır.
Qeyd edib ki, 6 fevral 2026-cı ildə Moskvanın Volokolamskoye şosesindəki yaşayış binasında hücum edən şəxs general-leytenant Vladimir Alekseyevə ən azı üç dəfə atəş açaraq hadisə yerindən qaçıb. Zərərçəkən Moskva xəstəxanalarından birinə yerləşdirilib:
"Müstəntiqlər hadisə yerində hərtərəfli yoxlama aparıblar və bu zaman qətl silahı – səsboğucu ilə birlikdə “Makarov” tapançası və üç patron aşkar ediblər. Genetik, barmaq izi, iz izi, molekulyar-genetik, fiziki-kimyəvi və digər testlər də daxil olmaqla 15-dən çox məhkəmə ekspertizası təyin edilib. Qısa müddət ərzində Federal Təhlükəsizlik Xidməti və Daxili İşlər Nazirliyi ilə əməkdaşlıq çərçivəsində bu cinayətin iştirakçısı olan Viktor Vasin Moskva vilayətində saxlanılıb. Onunla bağlı istintaq hərəkətləri davam etdirilir. O, Rusiya Cinayət Məcəlləsinin 317 və 222-ci maddələri ilə cinayətlərdə ittiham olunub. Bundan əlavə, Ukraynaya gedən Zinaida Serebritskayanın cinayətdə iştirakı müəyyən edilib. Cinayətdən bir neçə saat sonra Rusiyanı tərk edərək Birləşmiş Ərəb Əmirliklərinə uçan digər cinayətkarın şəxsiyyəti də müəyyən edilib. O, Ukrayna SSR-in Ternopol vilayətində anadan olmuş və hazırda Rusiya vətəndaşı olan, 1960-cı il təvəllüdlü Lyubomir Korbadır. FSB və Rusiya Daxili İşlər Nazirliyinin əməliyyatçıları, Rusiya İstintaq Komitəsinin müstəntiqləri və Birləşmiş Ərəb Əmirliklərindəki səlahiyyətli orqanlar tərəfindən görülən tədbirlər nəticəsində şübhəli saxlanılaraq Rusiya Federasiyasına qaytarılıb. Korbanın ötən ilin dekabr ayının sonlarında Ukrayna kəşfiyyat xidmətlərinin təlimatı ilə terror aktı törətmək üçün Moskvaya gəldiyi müəyyən edilib. Cinayətin bütün hallarını müəyyən etmək və cinayətkarları müəyyən etmək üçün istintaq hərəkətləri və əməliyyat-axtarış tədbirləri davam etdirilir".
Poliqon.info
