Bu gün Türkiyəni dərindən sarsıdan 6 Fevral zəlzələlərinin üçüncü ildönümüdür. “Əsrin fəlakəti” kimi tarixə düşən bu dəhşətli zəlzələlərdə həyatını itirən on minlərlə insanın acısı hələ də ürəkləri yandırır.
Azreform.info xatırladır ki, 2023-cü il fevralın 6-da Kahramanmaraş mərkəzli iki güclü zəlzələ baş verdi.
İlk zəlzələ səhər saat 04:17-də Pazarcıq rayonunda 7,7 bal gücündə, ikinci zəlzələ isə saat 13:24-də Elbistan rayonunda 7,6 bal gücündə qeydə alındı.
Zəlzələlər nəticəsində 11 vilayətdə böyük dağıntılar yaşandı. Rəsmi məlumatlara görə, 53 min 537 nəfər həyatını itirdi, 107 min 213 nəfər yaralandı. Ümumilikdə 108 min kvadratkilometrlik ərazidə yaşayan 14 milyon insan fəlakətdən təsirləndi. Kahramanmaraş, Hatay, Adıyaman, Qaziantep, Malatya, Kilis, Diyarbəkir, Adana, Osmaniyə, Şanlıurfa və Elazığ ən çox zərər görən bölgələr oldu.
Aparılan qiymətləndirmələrə əsasən, 35 min 355 bina tamamilə dağıldı, 17 min 491 bina isə təcili şəkildə sökülməlidir. 179 min 786 bina ağır, 40 min 228 bina orta, 431 min 421 bina isə az zərərli kimi qeydə alındı.
Fəlakətdən sonra 11 vilayətdə 350 çadır şəhərciyi quruldu, 645 min çadır və 215 min 224 konteyner yerləşdirildi. Bölgəyə ümumilikdə 106 milyard 728 milyon lirə vəsait ayrıldı.
Zəlzələlər böyük miqyaslı köçə də səbəb oldu. Türkiyə Statistika Qurumu’nun 2023-cü il məlumatına görə, zəlzələ bölgəsindəki 10 vilayətdən 715 min 29 nəfər başqa şəhərlərə köç etdi. Ən çox köç verən vilayət 164 min 247 nəfərlə Hatay oldu.
Zəlzələlər nəticəsində məhəllələr, rayonlar, hətta bütöv şəhərlər xəritədən silindi. 12 min 119 məktəb orta və ya ağır zərər aldı. Bölgədəki 116 xəstəxanadan 42-si ağır və orta, 94-ü isə az zərərli vəziyyətdədir.
Fəlakətin izlərini silmək üçün genişmiqyaslı tikinti işlərinə başlanılıb. 2025-ci ilin dekabr ayınadək 455 min mənzilin tikintisi tamamlanaraq hüquq sahiblərinə təhvil verilib. Yenidənqurma işləri hazırda da davam edir.
Həmidə İbrahimova
