ain.az bildirir, Kulis.az portalına istinadən.
Kulis.az Sevinc Elsevərin yeni şeirlərini təqdim edir.
Yeni il arzuları
Arzularını yazıb asdı yolkadan
Ev əhli.
Hətta pişiyin də diləyini yazmışdılar.
Gecə hamı yatandan sonra
Oxudu bütün məktubları ata
Diləklər ünvanlanmışdı Allaha, Kainata,
Amma “qızım, sənə deyirəm, gəlinim, sən eşit” misalı...
Həm də ona eşitdirilirdi
Arzuların çoxu
Ondan asılı idi
Xəyalların çin olmağı.
Onun gücündən,
Səxavətindən,
Cəsarətindən,
Alın tərindən.
***
Qar yağdı axşam
əl damından uzunboğaz çəkmələrimi götürdüm
içindən ölü siçan balaları töküldü
ana siçanı pişiyim tutub yemiş olar
İtki
Qəfil səhər süfrəsində,
Gecə şeir yazdığımı xatırladım.
Qəşəng şeir idi,
Yaxşı təəssüratı qalmışdı.
Yenidən oxumaq üçün açdım şeir dəftərimi,
Yox idi şeir.
Yuxumda yazmış və unutmuşammış.
Təkcə xatirəsi unudulmamış...
Qiymətli hədiyyəni itirmiş kimi,
Hiss etdim o an.
Gərək o yuxuya bir də qayıdam.
Çırpılma
Bütün gücüylə,
Şövqüylə uçan quş
Pəncərəyə çırpılan kimi
Çırpıldım həqiqətə:
bitibmiş sevgin.
Məni qanadlandıran sevgin idi,
Mən də uça bilirdim.
Naməhrəm əli
Binanın tinində
Atılmış köhnə pianoya,
Adamlar çılpaq və gözəl qıza
Baxırlarmış kimi zilləyirlər gözlərini.
Utancaq və təvazökar görkəmiylə,
Piano qaçmaq istəyir bu baxışlardan.
Kimsə toxunanda,
Naməhrəm əli dəymiş kimi diksinir.
***
Xoşbəxt idi qadıncığaz,
ərinin sədaqətiylə,
amma tez-tez şeytan yoldan çıxardırdı onu:
“sənə sadiqliyindən deyil vəfası”-pıçıldayırdı qulağına
Qalırdı iki yol ayrıcında
Nə desin,
Necə hiss etsin,
Şeytana lənət oxuyub,
Şükür etməyi seçirdi hər dəfə
ərinin Allah sevgisinə.
Zaman maşını
Nə keçmiş var
Nə gələcək
Həyat elə anlardan ibarətdirsə
Nə fərqi səksən yaşlı qocaya
Çox yaşamış
Ya az yaşamış
Geridə qoyduğu həyat
Sanki heç yaşanmamış.
Zamanın qəddarlığını hər şeydən çox anlamış
Sadəcə.
Bəlkə hansısa anların dadı damağında hələ də
Qısqanmıram avtobusda
Qabaq-qənşərimdə oturan yaşlı qadını
Eyni anın içindəyik
O da
Mən də
Anasının qoynunda mışıl-mışıl yatan körpə də
Avtobus zaman maşınıdır elə
İçində olduğumuz zamandan enəcək
Sərnişinlər
Zaman yoluna davam edəcək
“biri varmış, biri yoxmuş”-deyə...
İflas
Güllə kəsilməliykən sözüm,
Bankdan gələn hikkəli zənglə kəsilir nitqim.
Vatsapda dəm vurduğum yerdə,
Şeirdən, ədəbiyyatdan, böyük ideallardan
Qələm dostumla.
Sonrası gülləbaran, dava,
mübahisə,
göz yaşı
təkcə cibimizin deyil
gözəl idealların da iflası.
***
“Bir qəpiyin də yiyəsi deyiləm”-deyə
And içə bilmərəm bu gün.
Bir qəpiklik qazancım olub
Yüklədiyim ƏDV çekindən.
Halbuki səhərdən-axşama kimi
Bir qatırın işini görmüşəm.
***
Kirpiklərini yumub açır,
Sevinclə qışqırır uşaq:
“Ana, işıqları
Söndürüb-yandırıram, bir bax!”
Əllərindədir fələyin çərxi,
Ondan güclüsü yoxdur dəxi.
Alman casusu, fırıldaqçı və homoseksual – Lenin haqqında deyilənlər və yazılanlar
Eduard Manenin məktubu: “Söyüşlər üzərimə dolu kimi yağırdı”
Zəlimxan Yaqubun yetimləri - Şərif Ağayar
Daha ətraflı məlumat və yeniliklər üçün ain.az saytını izləyin.
