Liviyada keçmiş diktator Muammar Kaddafinin oğlu Səif əl-İslam Kaddafinin öldürüldüyü bildirilir. Vətəninfo.az xəbər verir ki, Reuters agentliyinin məlumatına görə, hadisə fevralın 3-də baş verib. Səif əl-İslamın ofisinin yaydığı açıqlamada qeyd olunub ki, o, naməlum silahlı şəxslərlə baş verən birbaşa qarşıdurma zamanı həlak olub. Bildirilib ki, silahlı şəxslər onun yaşadığı evə daxil olub, lakin hadisənin detalları açıqlanmayıb.
Səif əl-İslam Kaddafi uzun illər Liviyanın siyasi həyatında mühüm fiqur sayılıb və beynəlxalq aləmdə tanınan şəxslərdən biri olub. O, atasının hakimiyyəti dövründə mümkün varis kimi qiymətləndirilib və ölkənin gələcəyinin formalaşmasında əsas rol oynayan şəxslərdən biri hesab olunub. Onun rəhbərliyi ilə Liviya kütləvi qırğın silahlarından imtina ilə bağlı danışıqlar aparıb. Həmçinin 1988-ci ildə Şotlandiyada Pan Am aviaşirkətinə məxsus təyyarənin partladılması nəticəsində həlak olanların ailələrinə kompensasiya ödənilməsinə nail olunub.
Londonda təhsil alan və ingilis dilini sərbəst bilən Səif əl-İslam Qərb ölkələri ilə münasibətlərin yaxşılaşdırılmasının tərəfdarı kimi çıxış edib. O, Liviyanın beynəlxalq təcriddən çıxması, konstitusiya qəbul edilməsi və insan hüquqlarına hörmət olunması ilə bağlı islahat çağırışları edib. Bu səbəbdən bir sıra Qərb ölkələrində onu qəbul edilə bilən siyasi fiqur kimi dəyərləndirirdilər.
Lakin 2011-ci ildə Liviyada baş verən xalq üsyanı zamanı Səif əl-İslam atasının tərəfini tutub və müxalif qüvvələrə qarşı sərt mövqe nümayiş etdirib. O, çıxışlarında üsyançıları “siçanlar” adlandırıb və ölkədə qan töküləcəyini açıq şəkildə bəyan edib. Kaddafi rejimi devrildikdən sonra Səif əl-İslam ölkədən qaçmağa cəhd göstərsə də, Niger sərhədi yaxınlığında saxlanılaraq Zintan şəhərinə aparılıb.
O, Zintanda altı il həbsdə saxlanılıb. 2015-ci ildə Tripolidəki məhkəmə onu ölüm cəzasına məhkum etsə də, 2017-ci ildə elan edilən amnistiya nəticəsində azadlığa buraxılıb. Səif əl-İslam 2018 və 2021-ci illərdə prezident seçkilərində iştirak etmək istəsə də, həmin seçkilər keçirilməyib.
Səif əl-İslam Kaddafi 2011-ci ildən sonra da Liviyanın siyasi gələcəyinə təsir göstərə biləcək əsas fiqurlardan biri olaraq qalırdı. Onun ölümü ölkədəki onsuz da mürəkkəb olan siyasi vəziyyətin daha da qeyri-müəyyənləşəcəyinə dair suallar yaradıb.
Son məlumatlara görə, Rusiya Liviyada hərbi mövcudluğunu gücləndirməkdə davam edir. Analitiklərin bildirdiyinə görə, feldmarşal Xəlifə Haftarın nəzarətində olan qüvvələr Rusiya istehsalı olan hərbi texnika ilə təchiz olunub. Ekspertlər hesab edirlər ki, bu silahlar Rusiyanın Ukraynadakı müharibə zamanı itirdiyi hərbi texnikanın bir hissəsini kompensasiya etmək məqsədi daşıya bilər.
