ABŞ Mərkəzi Komandanlığı (CENTCOM) ABŞ-a məxsus aviadaşıyıcının yaxınlığında İran pilotsuz uçuş aparatının vurulduğunu təsdiqləyib.
NOCOMMENT.az xəbər verir ki, ABŞ Hərbi Dəniz Qüvvələrinə məxsus F-35C qırıcısı USS Abraham Lincoln aviadaşıyıcısına doğru aqressiv şəkildə yaxınlaşan İran istehsalı pilotsuz uçuş aparatını məhv edib. Bu barədə Fox News telekanalına ABŞ Silahlı Qüvvələrinin Mərkəzi Komandanlığının (CENTCOM) rəsmi nümayəndəsi, kapitan Tim Hokins məlumat verib.
Onun sözlərinə görə, hadisə aviadaşıyıcı USS Abraham Lincoln Ərəb dənizində, İranın cənub sahillərindən təxminən 800 kilometr məsafədə olarkən baş verib. İranın “Şahed-139” tipli pilotsuz uçuş aparatı gəmi istiqamətində manevr edib və ABŞ qüvvələrinin beynəlxalq sularda həyata keçirdiyi deeskalasiya tədbirlərinə baxmayaraq, kursunu dəyişməyib.
Kapitan Tim Hokins bildirib ki, pilotsuz aparat gəmi və şəxsi heyətin təhlükəsizliyini təmin etmək məqsədilə, özünümüdafiə çərçivəsində məhv edilib.
***
ABŞ Silahlı Qüvvələri Ərəb dənizində ABŞ Hərbi Dəniz Qüvvələrinə məxsus aviadaşıyıcıya yaxınlaşan İran istehsalı pilotsuz uçuş aparatını (PUA) məhv edib.
NOCOMMENT.az xəbər verir ki, bu barədə Reuters agentliyinə açıqlama verən amerikalı rəsmi bildirib.
Məlumata görə, insident ABŞ aviadaşıyıcı qrupunun Ərəb dənizində beynəlxalq sular ərazisində fəaliyyət göstərdiyi vaxt baş verib. İran PUA-sı aviadaşıyıcıya təhlükəli məsafədə yaxınlaşdığı üçün ABŞ qüvvələri onu potensial təhdid kimi qiymətləndirərək zərərsizləşdirib.
Amerikalı rəsminin sözlərinə görə, hadisə zamanı ABŞ hərbi personalına və ya texnikasına zərər dəyməyib. O vurğulayıb ki, ABŞ qüvvələri regionda öz təhlükəsizliyini və dəniz naviqasiyasının azadlığını təmin etmək üçün bütün zəruri tədbirləri görür.
Hadisə Yaxın Şərqdə və Fars körfəzi hövzəsində gərginliyin artdığı bir dövrdə baş verib. Son aylarda ABŞ və İran arasında qarşılıqlı ittihamlar, hərbi fəallıq və dənizdə insidentlərin sayı artmaqdadır. Analitiklər bildirirlər ki, bu cür hadisələr regionda vəziyyətin daha da gərginləşməsi riskini artırır.
ABŞ Müdafiə Nazirliyi məsələ ilə bağlı əlavə təfərrüatların açıqlana biləcəyini istisna etməyib. İran tərəfi isə hələlik insidentlə bağlı rəsmi mövqe açıqlamayıb.
Sara
