Alimlər Antarktidada yerləşən və “Qiyamət buzlağı” adlandırılan Thwaites buzlağının əriməsinin qarşısını almaq üçün radikal geomühəndislik həlləri üzərində işləyirlər.
QHT.az xəbər verir ki, bu buzlaq çökərsə, qlobal dəniz səviyyəsi yarım metrdən çox arta bilər və böyük fəsadlara yol aça bilər. Tədqiqatçılar isti okean cərəyanlarının buzlağın altına daxil olmasının qarşısını almaq üçün sualtı “pərdə” və ya divar qurulması ideyasını modelləşdirirlər. Növbəti iki il ərzində buzlaq ərazisinə yerləşdirilən sensorlar bu layihənin mümkünlüyü barədə əsaslı məlumatlar verəcək.
Geomühəndislik tərəfdarları hesab edirlər ki, bu cür lokal müdaxilələr böyük şəhərlərin su altında qalmasının qarşısını almaq üçün zəruri ola bilər. Lakin bir sıra alimlər bu yanaşmanı təhlükəli, baha və ekosistemlər üçün riskli hesab edir və diqqətin əsasən karbon emissiyalarının azaldılmasına yönəldilməsini vacib sayırlar. Tənqidçilərin fikrincə, belə layihələr dekarbonizasiyadan yayındırıcı amil ola bilər. Buna baxmayaraq, tərəfdarlar bildirirlər ki, buzlaqların qorunması üçün əlavə tədbirlər görülməzsə, gələcəkdə fəlakətli nəticələr qaçılmaz olacaq.
R.İmanov
