Səudiyyə Ərəbistanı mətbuatının məlumatına görə, “Əl-Nəsr” klubu rəhbərliyi ölkə çempionatında “Ər-Riyad”la keçirilən oyundan (1:0) əvvəl və sonra futbolçuların və baş məşqçinin fləş-müsahibə zonasına çıxmasına icazə verməyib.
QOL.az xəbər verir ki, bu barədə A Bola xəbər yayıb.
Nəticədə nə baş məşqçi Jorje Jezuj, nə də komandanın futbolçuları media öhdəliklərini yerinə yetiriblər. Portuqaliyalı mütəxəssis Səudiyyə liqasında ənənəvi olan oyunöncəsi fləş-müsahibədə və “Ər-Riyad”la görüşdən sonra keçirilən mətbuat konfransında da iştirak etməyib.
Səudiyyə mediası bildirir ki, Jorje Jezuj oyundan sonra açıqlama verməməsinə görə üzr istəyib.
Xəbərdə vurğulanır ki, bu vəziyyət klub rəhbərliyindən narazı olan və “Ər-Riyad”la oyunda meydana çıxmaqdan imtina edən portuqaliyalı hücumçu Kriştiano Ronaldonun boykotu fonunda baş verib.
