İordaniya xarici işlər naziri Ayman Səfadi İran xarici işlər naziri Abbas Əraqçiyə ölkəsinin İrana mümkün hücumda hava məkanının istifadəsinə icazə verməyəcəyini bildirib.
İran mətbuatında yer alan xəbərlərə görə, Əraqçi və Səfadi telefon danışığı aparıblar.
Zəng zamanı Səfadi beynəlxalq hüquqa hörmət edilməli olduğunu və İordaniyanın ölkələrin suveren hüquqlarının pozulmasına qarşı olduğunu bildirib və əlavə edib ki, ölkəsi İrana qarşı hər hansı bir hərbi əməliyyat üçün başlanğıc nöqtəsi kimi istifadə olunmasına icazə verməyəcək.
Səfadi həmçinin bildirib ki, İordaniya regionda gərginliyin azaldılması üçün bütün səyləri dəstəkləyəcək.
Əraqçi öz növbəsində İordaniyanın mövqeyinə və regionda təhlükəsizlik və sabitliyin təmin edilməsi səylərinə görə minnətdarlığını bildirib.
