Bu məhsullar əlavə maddələrlə həddindən artıq yüklənib və mütləq hipertoniyanı təhrik edə bilər, buna görə onları ümumiyyətlə qəbul etməmək daha yaxşıdır.
Moderator.az xəbər verir ki, yüksək təzyiq zamanı bu 8 məhsulu yeməyin:
Emal olunmuş qidalar çox vaxt çoxlu əlavə şəkər, duz, trans yağlar və qan təzyiqini yüksəldə bilən digər maddələr ehtiva edir. Hipertoniya ürək-damar xəstəlikləri və digər problemlərin riskini artırdığı üçün bu cür qidalardan imtina profilaktikada mühüm rol oynayır,
Dondurulmuş hazır yeməklər
Pitsa, yarımfabrikatlar və burritolar kimi məhsullarda natrium səviyyəsi adətən yüksək olur. İstehsalçılar saxlama müddətini uzatmaq və dadı yaxşılaşdırmaq üçün çoxlu duz əlavə edirlər. Bəzi məhsullar böyüklər üçün tövsiyə olunan gündəlik natrium normasının 25 faizi və ya daha çoxunu ehtiva edə bilər.
Qidalanma tövsiyələrinə görə gündəlik natrium qəbulu 2300 milliqramdan çox olmamalıdır. Natriumun həddindən artıq qəbulu isə hipertoniyanın artmış riski ilə əlaqələndirilir.
Qurudulmuş ət məhsulları
Araşdırmalar göstərib ki, qurudulmuş ət məhsullarındakı nitritlər qan təzyiqini yüksəldə və nəticədə ürək xəstəlikləri riskini artıra bilər. Tədqiqatçılar hesab edir ki, nitritlər oksidləşdirici zədələnməni gücləndirərək hipertoniyaya səbəb ola bilər.
Şirinləşdirilmiş içkilər
Enerji içkiləri və qazlı içkilər, xüsusilə həddindən artıq qəbul edildikdə, yüksək qan təzyiqi riskini artırır. Tərkibində əlavə şəkər olan içkilər iltihab və hipertoniyanın əsas səbəblərindən biri sayılır. Bir meta-analizə görə, bu cür içkiləri çox qəbul edən insanlarda yüksək qan təzyiqi inkişaf riski az qəbul edənlərlə müqayisədə 12 faiz daha yüksəkdir.
Paketlənmiş qəlyanaltılar
Bir çox çips, kraker və şirniyyat növləri yüksək miqdarda duz və doymuş və ya trans yağlar ehtiva edir ki, bu da arterial təzyiqi yüksəldə bilər. Bu məhsulların həddindən artıq qəbulu iltihaba, oksidləşdirici stressə və qanda lipid profilinin dəyişməsinə səbəb ola bilər.
Bu amillər isə qan təzyiqinin artmasına gətirib çıxarır. Qəlyanaltı seçərkən əlavə şəkəri, natriumu və doymuş və ya trans yağları az olan məhsullara üstünlük vermək məsləhətdir.
Fast-fud
Fast-fud adətən çoxlu natrium, doymuş və trans yağlar, eləcə də əlavə şəkər ehtiva edir. Fast-fudla tez-tez qidalanan insanlarda hipertoniyanın yaranma riski artır.
Qızardılmış yeməklər
Qızardılmış toyuq, kartof fri kimi yeməklər natrium, doymuş və trans yağların geniş yayılmış mənbəyidir. Bu maddələr damarların tutulmasına və qan təzyiqinin yüksəlməsinə səbəb ola bilər.
Meta-analizə əsasən, qızardılmış qidaların qəbulu hipertoniyanın, həmçinin piylənmə kimi digər sağlamlıq problemlərinin artmış riski ilə əlaqələndirilir. Digər bir araşdırma isə göstərib ki, qızardılmış yeməkləri çox qəbul edən qadınlarda prehipertoniya və hipertoniya riski əhəmiyyətli dərəcədə yüksəlir.
Alkoqol
Gündə üç və daha çox spirtli içki qəbul etmək yüksək qan təzyiqi riskini artırır və bu da gələcəkdə ürək xəstəliklərinə səbəb ola bilər. Həmçinin alkoqolun mərkəzi sinir sisteminə təsir edərək qəbuldan dərhal sonra təzyiqi yüksəldə biləcəyi barədə məlumatlar var.
Konservləşdirilmiş qidalar
Bəzi konserv məhsulları yüksək natrium tərkibinə görə qan təzyiqini artıra bilər. İstifadədən əvvəl konservləri yumaq natrium miqdarını bir qədər azaltmağa kömək edə bilər. /Lent.az/
