Rusiya Təhlükəsizlik Şurası sədrinin müavini Dmitri Medvedev TASS, Reuters və Wargonzo layihəsinə verdiyi müsahibədə 2026-cı il üçün “inanılmaz” hesab etdiyi proqnozlarını səsləndirib.
“İki sahil” xəbər verir ki, o, az ehtimallı hadisələr sırasında NATO-nun dağılmasını və Avropa İttifaqının (Aİ) Rusiya nefti və qazını yenidən almağa qayıtmasını qeyd edib. Medvedevin fikrincə, hər iki ssenari “planet üçün faydalı olardı”.
Medvedev bildirib ki, mümkün, lakin real görünməyən variantlardan biri Aİ-nin Rusiya Federasiyasından üzr istəməsi və yenidən qaz və neft almaq xahişi ilə çıxış etməsidir. Digər ssenari isə Şimali Atlantika Alyansının ABŞ-ın təşkilatdan çıxması fonunda dağılmasıdır. Onun sözlərinə görə, bu hadisələrin hər ikisi qlobal miqyasda müsbət nəticələr verə bilər.
O, bu ssenarilərin reallaşma ehtimalını da dəyərləndirib: “Yəqin ki, hər bir inanılmaz hadisə kimi, bu da mümkündür”.
Xatırladaq ki, yanvarın 26-da Aİ Şurası 2027-ci ildən etibarən Rusiyadan mayeləşdirilmiş təbii qazın (SPQ) idxalına qadağa qoyulmasını razılaşdırıb və bu qadağanın pozulmasına görə milyonlarla avro məbləğində cərimələr nəzərdə tutub. Kreml bu qərarı son dərəcə əsassız addım kimi qiymətləndirib. Slovakiya və Macarıstan isə qadağaya etiraz etmək üçün Aİ Məhkəməsinə iddia qaldırmaq niyyətində olduqlarını açıqlayıblar.
