Meksika Prezidenti Klaudiya Şeynbaum Kubaya humanitar yardım göndərməyi planlaşdırdığını açıqlayıb.
"Unikal" xarici KİV-ə istinadən xəbər verir ki, Şeynbaumun bu açıqlamaları ABŞ prezidenti Donald Trampın Meksika liderindən Karib adasına neft daşınmasını dayandırmasını istəməsindən sonra səsləndirilib.
Şeynbaum Sonora ştatının şimalında keçirilən ictimai tədbirdə bildirib ki, Trampla telefon danışığında Kuba məsələlərini müzakirə etməyib. O əlavə edib ki, hökuməti "humanitar səbəblərdən (Kubaya) neft daşınması ilə bağlı hər şeyi diplomatik yolla həll etməyə" çalışır.
Xatırladaq ki, Tramp daha əvvəl jurnalistlərə açıqlamasında Meksika prezidentinə Kubaya neft göndərməməyi tapşırdığını bildirmişdi.
ABŞ-nin yanvarın əvvəlində Venesuela prezidenti Nikolas Maduronu devirmək üçün həyata keçirdiyi hərbi əməliyyatdan sonra Cənubi Amerika ölkəsi son illərdə azalan Kubaya neft tədarükünü dayandırdı.
