Müəllif:Mehin Qasımova,Banco.az
Kriptovalyuta bazarlarında satış təzyiqi yeni həftənin əvvəlində də davam edir.
Banco.az xəbər verir ki, dünyanın ən bahalı kriptovalyutası olan Bitkoin son 24 saatda “CoinMarketCap” platformasında 4.11% ucuzlaşaraq 75 447 ABŞ dolları təşkil edib.
Beləliklə, Bitcoin ardıcıl dördüncü ayı itkilərlə başa vurub.Bazar göstəriciləri investorların riskdən qaçmağa üstünlük verdiyini ortaya qoyur.
Son eniş dalğası ABŞ Prezidenti Donald Trampın Federal Ehtiyat Sisteminin (FED) rəhbərliyinə, Cerom Pauellin səlahiyyət müddəti mayda bitdikdən sonra Kevin Uorşu namizəd göstərəcəyini açıqlaması fonunda güclənib. Bu açıqlama pul siyasətinin daha sərt ola biləcəyi ehtimallarını gündəmə gətirib və riskli aktivlərə marağı azaldıb.
Təzyiq yalnız Bitkoinlə məhdudlaşmır. Efir və digər rəqəmsal aktivlər də ucuzlaşmaqda davam edir. Qızıl və gümüş bazarlarında müşahidə olunan enişlərdən sonra kriptovalyutalara olan təzyiq daha da artıb.
Bitkoin 2026-cı ilin əvvəlindən bəri 12%-dən çox, Ether isə 23% dəyər itirib. Ümumilikdə kriptovalyuta bazarının kapitallaşması ötən ilki pik göstərici ilə müqayisədə təxminən 1,7 trilyon dollar və ya 39% azalıb.
