BAKI, TurkicWorld, Orxan Qədirzadə
İran rəsmisi qlobal mediada yayılan müharibə ssenarilərinə baxmayaraq, Tehranla Vaşinqton arasında danışıqlar üçün zəmin formalaşdırıldığını bəyan edib.
TurkicWorld xəbər verir ki, İran Milli Təhlükəsizlik Ali Şurasının baş katibi Əli Laricani sosial media platforması X-də paylaşım edərək, mediada süni şəkildə yaradılan müharibə gözləntilərinin əksinə olaraq, danışıqlar üçün institusional çərçivənin formalaşdırılması prosesinin irəlilədiyini bildirib. Onun sözlərinə görə, ictimai rəy müharibəyə fokuslansa da, pərdəarxası diplomatik mexanizmlər üzərində iş davam edir.
Laricani qeyd edib ki, İran tərəfi müzakirələrə prinsip etibarilə açıqdır, lakin bu proses yalnız bərabərhüquqlu və təhdidlərdən kənar mühitdə mümkün ola bilər. O vurğulayıb ki, Tehran təzyiq və hədələr fonunda danışıqlara başlamağı qəbuledilməz hesab edir.
Xatırladaq ki, son həftələr İranın nüvə proqramı, regional təhlükəsizlik və ABŞ administrasiyasının sərt bəyanatları fonunda mümkün hərbi qarşıdurma ehtimalları beynəlxalq mediada geniş müzakirə olunur. İran rəsmilərinin son açıqlamaları isə bu ssenarilərin rəsmi mövqeyi əks etdirmədiyini göstərir.
