Balın xüsusi müalicəvi xüsusiyyətləri yoxdur, üstəlik, qızdırıldıqda potensial kanserogen təsirə malik birləşmələrə parçalana bilər.
Far.Az xəbər verir ki, bu barədə rusiyalı həkim Andrey Kondraxin bildirib. Mütəxəssis balı isti çaya əlavə etməməyi tövsiyə edib. Çünki yüksək temperatur onun faydalı komponentlərini məhv edir.
Həkimin sözlərinə görə, güclü qızdırılma zamanı balın tərkibində kanserogen potensiala malik maddələrin əmələ gəldiyi barədə məlumatlar var. Bu, birbaşa xərçənglə əlaqə demək olmasa da, oxşar proseslər müəyyən qədər təsir göstərə bilər. Bundan əlavə, yüksək temperaturda əksər vitaminlər dağılır və nəticədə məhsulda əsasən şəkər - xüsusilə fruktoza qalır.
Ekspert həmçinin şəkərli diabetdən əziyyət çəkən insanlara balı ehtiyatla istifadə etməyi məsləhət görüb. Bununla yanaşı, o qeyd edib ki, müəyyən miqdarda şəkər orqanizm üçün vacibdir, xüsusilə günün birinci yarısında.
Kondraxin izah edib ki, əsas məsələ qəbul edilən ümumi şəkər miqdarına nəzarətdir. Fəal fiziki hərəkətlər zamanı bu şəkər əzələlər tərəfindən sərf olunur və orqanizmdə yığılmır.
Mütəxəssis əlavə edib ki, balın xüsusi müalicəvi xüsusiyyətlərə malik olması barədə fikir mifdir. Onun sözlərinə görə, bu məhsula yalnız qida mənbəyi kimi yanaşmaq lazımdır, dərman vasitəsi kimi yox.
Sonda həkim qeyd edib ki, arılar balı qış aylarında enerji mənbəyi kimi istifadə edirlər. Tarixən insanlar üçün də bal uzun müddət ərzində yeganə əlçatan şəkər mənbəyi olub.
