ABŞ-ın Qəzza üzrə Mülki-Hərbi Koordinasiya Mərkəzinin (CMCC) hərbi və mülki rəsmiləri işdən çıxır və hələlik onların yerinə təyinat olmayıb.
APA xəbər verir ki, bu barədə “Reuters” anonim mənbələrə istinadən məlumat yayıb.
Bildirilib ki, Mülki-Hərbi Koordinasiya Mərkəzinin rəhbəri, general-leytenant Patrik Frenk daha aşağı rütbəli ABŞ zabiti ilə əvəz olunacaq.
Qurumun mülki rəhbəri isə ABŞ-ın Yəməndəki səfiri kimi fəaliyyətinə davam etmək üçün öz ölkəsinə qayıdıb.
Pentaqon “Reuters”in sorğusuna cavab verməyib.
Mənbələr əlavə edib ki, Mülki-Hərbi Koordinasiya Mərkəzi humanitar yardım da daxil olmaqla funksiyalarını yerinə yetirə bilmir.
Qeyd edək ki, sözügedən qurum ötən ilin oktyabrında Qəzza Sülh Planının ilk mərhələsi çərçivəsində yaradılıb və HAMAS-İsrail atəşkəs rejiminə nəzarət etmək, eləcə də Qəzzaya humanitar yardımın daxil edilməsini asanlaşdırmaq funksiyası daşıyır.
