Sülh, əməkdaşlıq və iqtisadi tərəfdaşlıq yolunda görüş...
Böyük Britaniyanın baş naziri Kir Starmer bu həftə Pekində Çin lideri Si Tszinpinlə görüşüb. Bu, son 8 ildə Britaniya liderinin Çinə ilk rəsmi səfəridir.
Moderator.az xəbər verir ki, bu barədə "euronews.com" nəşri məlumat yayıb.
Britaniya və Çin yaxınlaşır
Görüşün məqsədi ikitərəfli münasibətləri yaxşılaşdırmaq, uzun illər davam edən gərginliyi aradan qaldırmaq və ticarət əlaqələrini genişləndirməkdir. Münasibətlər xüsusilə Çin casusluğu iddiaları, Honkonq məsələsi və Pekinin Ukraynadakı müharibədə Rusiyaya dəstəyi səbəbindən gərginləşmişdi.
Starmer görüşün əvvəlində deyib: "Bugün burada Böyük Britaniya xalqı üçün gəlmişəm. 18 ay əvvəl hökumətə seçiləndə vəd verdim ki, Britaniya dünyaya açılacaq. Çünki xaricdə baş verən hadisələr bizə supermarket rəflərindəki qiymətlərdən tutmuş təhlükəsizlik hissimizə qədər birbaşa təsir göstərir". Baş nazir vurğulayıb ki, Britaniya və Çin arasında "uzunmüddətli, ardıcıl və hərtərəfli strateji tərəfdaşlıq" zəruridir.
İqtisadi əməkdaşlıq və şirkət imkanları
Starmer ölkəsinin iqtisadi böyüməsi yavaş olduğundan Britaniya şirkətləri üçün yeni imkanlar yaratmaq niyyətindədir. Səfərdə ona 50-dən çox yüksək səviyyəli menecer və bir sıra mədəniyyət təşkilatlarının rəhbərləri müşayiət edir. Baş nazir qeyd edib: "Ətraf mühit və qlobal sabitlik kimi məsələlərdə birgə işləmək, çətin dövrlərdə dünya üçün vacib olan addımlardan biridir".
Görüşdən əvvəl Starmer Çinlə ticarət və investisiya sahəsində bir sıra müqavilələrin imzalanacağını bildirib. Bu addım bir neçə il soyumuş Çin-Böyük Britaniya münasibətlərini bərpa etmək və iqtisadi əməkdaşlığı genişləndirmək üçün ilk addım olacaq.
"Çin heç kimi təhdid etməyəcək"
Çin lideri Si Tszinpin görüşdə vurğulayıb ki, ölkəsinin inkişaf məqsədləri tamamilə sülhsevərdir. O deyib ki, Çin heç vaxt müharibə başlamayıb və digər dövlətlərin torpaqlarını işğal etməyib. Hər nə qədər Çin güclənsə də, heç vaxt digər ölkələrə təhdid olmayacaq.
Si həmçinin Çin və Britaniyanın geniş əməkdaşlığa hazır olduğunu bildirib: "Çin və Böyük Britaniya dialoqu və əməkdaşlığı gücləndirməli, dünyanın sülh və sabitliyini qoruyaraq hər iki ölkənin iqtisadi inkişafına dəstək verməlidir". Starmer isə qeyd edib ki, Britaniyanın iqtisadi artımı və rifahı dünyanın ən böyük dövlətləri ilə qarşılıqlı əlaqədən birbaşa asılıdır.
