Beynəlxalq Futbol Federasiyaları Assosiasiyası (FIFA) 2025-ci il üçün qlobal transfer hesabatını dərc edib.
Yeniavaz.com xəbər verir ki, hesabata görə, kişi və qadın peşəkar və həvəskar futbolunda rekord sayda – 86 min 158 beynəlxalq transfer həyata keçirilib.
Tarixdə ilk dəfə olaraq klub transfer xərcləri 10 milyard dolları keçərək, 13,11 milyard dollarla rekord həddə çatıb. Bu isə 2024-cü ildəki xərclərdən 52,3%, 2023-cü ildəki xərclərdən isə 35,6% çoxdur.
FIFA hesabatında həmçinin bildirilir ki, 2025-ci ildə transferlərdə 5 283 klub iştirak edib.
2025-ci ildə oyunçulara ən çox pul xərcləyən ilk üç klub İngiltərənin “Mançester Siti”, “Liverpul” və “Çelsi” klubları olub.
İlin ən böyük transferləri “Liverpul” klubuna olub: Aleksandr İsak “Nyukasl”dan (172 milyon dollar), Florian Virts “Bayer Leverkuzen” dən (149 milyon dollar), Yuqo Ekitiku isə “Ayntraxt Frankfurt”dan (113 milyon dollar).
Ən populyar transfer marşrutu Braziliya klublarından Portuqaliya klublarına olub. Belə ki, bu klublar arasında 184 belə transfer qeydə alınıb.
2025-ci ildə bütün transferlərin təxminən üçdə ikisi (64,3%) eyni konfederasiya daxilindəki klublar arasında baş verib.
UEFA klubları arasında transferlər ən böyük paya sahib olub və bütün transferlərin 41,2%-ni (10 119) təşkil edib.
Avropa transfer xərclərinə görə liderliyini davam etdirir və UEFA klubları qlobal xərclərin 80%-dən çoxunu təşkil edir.
Qadın futbolunda ümumi transfer xərcləri rekord həddə - 28,6 milyon dollara çatdı ki, bu da əvvəlki ilə nisbətən 80%-dən çoxdur.
