2025-ci ilin yayında ABŞ Kiber Təhlükəsizlik və İnfrastruktur Mühafizəsi Agentliyinin (CISA) rəhbəri vəzifəsini icra edən Madhu Gottumukkala rəsmi sənədləri ChatGPT-nin ictimai versiyasına yükləyib. Bu, avtomatik təhlükəsizlik sistemlərinin reaksiyasına səbəb olub. Hadisə barədə ABŞ Daxili Təhlükəsizlik Departamentindəki mənbələr Politico-ya məlumat verib.
Söhbət yalnız “rəsmi istifadə üçün” işarəsi daşıyan və ictimai yayım üçün nəzərdə tutulmayan CISA müqavilə sənədlərindən gedir. Mənbələr bildirir ki, fayllarda gizli məlumatlar olmasa da, onların açıq süni intellekt xidmətinə yüklənməsi avqustun əvvəlində monitorinq sistemi tərəfindən bir neçə xəbərdarlıqla nəticələnib. Bundan sonra şöbə rəhbərliyi mümkün riskləri qiymətləndirmək üçün daxili araşdırma aparıb, lakin nəticələr hələ açıqlanmayıb.
Hadisə, xüsusilə Gottumukkala-nın əvvəllər ChatGPT-dən istifadə üçün fərdi icazə alması və xidmətin şöbənin əksər işçiləri üçün bloklanması faktları ilə diqqət çəkir. CISA açıqlayıb ki, giriş müvəqqəti olub və istifadəyə müəyyən məhdudiyyətlər tətbiq edilib, ChatGPT-dən istifadə isə qısamüddətli xarakter daşıyıb.
Qeyd edək ki, ChatGPT-nin ictimai versiyası yüklənmiş məlumatları OpenAI şirkətinə ötürür, bu isə potensial olaraq həmin məlumatların modelin təlimi və digər istifadəçilərin sorğularının emalı üçün istifadə edilməsinə imkan yaradır.
