ABŞ Prezidenti Donald Tramp ikinci Amerika hərbi donanmasının İrana doğru üzdüyünü bildirərək, bu ölkəni razılaşma əldə etməyə çağırıb.
"Hazırda daha bir gözəl donanma İrana doğru üzür... Ümid edirəm ki, onlar razılaşma imzalayacaqlar", - deyə Ayova ştatındakı Respublikaçıların mitinqində bildirən Amerika prezidenti hansı razılaşmadan danışdığını dəqiqləşdirməyib.
Tramp daha öncə İran hökumətinin ölkədəki etirazları sərt şəkildə yatırması səbəbindən İrana qarşı mümkün güc tətbiqi barədə bir neçə dəfə xəbərdarlıq edib. 16 yanvarda o, özünü İranı bombalamamağa inandırdığını bildirib, baxmayaraq ki, "The Wall Street Journal"dakı mənbələrə görə, ABŞ-ın Yaxın Şərqdəki müttəfiqləri - İsrail və ərəb ölkələri onu buna razı salıb.
23 yanvarda isə İrana doğru böyük bir Amerika donanmasının yerləşdiriləcəyini elan edən Amerika prezidenti ABŞ-ın bu addımı "ehtiyac üçün" atdığını və donanmadan istifadə edilməyəcəyinə ümid etdiyini bildirib.
Bundan əlavə, The Economist-in məlumatına görə, ABŞ İran yaxınlığında Patriot hava hücumundan müdafiə sistemi və Terminal Yüksək Hündürlük Ərazi Müdafiəsi (THAAD) raketdən müdafiə sistemi də daxil olmaqla əlavə qüvvələr və aktivlər də yerləşdirib.
27 yanvarda Tramp Axios-a verdiyi müsahibədə İranın ABŞ ilə danışıqlar apararaq razılaşma əldə etmək istədiyini açıqladı. Amerika prezidentinin sözlərinə görə, diplomatik razılaşma mümkün çıxış yolu olaraq qalır, baxmayaraq ki, İran sahillərindəki ABŞ donanması artıq ABŞ-ın Venesuela sahillərində yaratdığı donanmanın ölçüsünü aşır.
The Economist ABŞ-ın İran yaxınlığında Patriot və THAAD raketlərini yerləşdirdiyini öyrənib.
İran İslam İnqilabı Keşikçiləri Korpusunun (İİKK) komandanı general Məhəmməd Pakpur isə xəbərdarlıq edib ki, İran qüvvələri "tələyə tam nəzarət edir".
Xatırladaq ki, ikinci prezidentliyi dönəmində Tramp İranla nüvə sazişi əldə etmək istədiyini bildirib və iki ölkə İranın nüvə proqramını məhdudlaşdıracağı mümkün razılaşma ilə bağlı bir neçə raund danışıqlar aparıb. Lakin 2025-ci ilin iyun ayında İslam Respublikasının Prezidenti Məsud Pezeşkian İranın nüvə proqramının dinc xarakter daşımasına zəmanət verməyə hazır olduğunu, lakin onun "sıfırlanmasına" razı olmayacağını bildirdi. Həmin ayın sonunda ABŞ İran hədəflərinə bunker partlayıcıları və qanadlı raketlərlə zərbələr endirdi. Hələlik razılaşma əldə edilməyib.
SAMİRƏ
