Bakı, 28 yanvar, AZƏRTAC
Dubay şəhər bələdiyyəsi robot tikinti sistemlərindən istifadə edərək tikiləcək dünyanın ilk villasının maketini təqdim edib.
AZƏRTAC rəsmi “Emirates” agentliyinə istinadla xəbər verir ki, layihə 25-dən çox qabaqcıl texnologiya şirkəti, akademik qurumdan ibarət yerli və beynəlxalq konsorsium vasitəsilə həyata keçirilir. Təşəbbüs, Dubayı qabaqcıl tikinti texnologiyaları mərkəzi kimi təqdim edərkən, gələcək tikinti üçün miqyaslı modellər hazırlamaq, məhsuldarlığı, dayanıqlığı və tikintinin keyfiyyətini artırmaq məqsədi daşıyır.
“Robot-villa” layihəsi tikinti robot texnologiyaları şirkətlərinin yerli podratçılar və mühəndislik firmaları ilə birlikdə iştirakı ilə “Zacua Ventures” və “Würth Group” ilə tərəfdaşlıqda həyata keçirilir. Onun anonsu tikinti materialları, sistemləri və texnologiyaları sahəsində innovasiya və tədqiqat üçün xüsusi bir mərkəz yaratmaq üzrə müqavilə imzalandıqdan sonra “Expo City Dubai” çərçivəsində Tikinti İnnovasiyası və Tədqiqat Mərkəzinin (04 ConTech Valley) işə başlaması münasibətilə keçirilən tədbirdə verilib. Bu mərkəz yeni nəsil tikinti həllərinin, şəhər sistemlərinin və gələcək şəhər infrastrukturunun inkişafını dəstəkləməyi hədəfləyir.
Tədbir zamanı təqdim edilən hesabatda tikinti texnologiyalarının qlobal miqyasda sürətlə tətbiq olunması və layihələrin təhlili fonunda bu sektora investisiyaların 2033-cü ilə qədər 30 milyard dolları keçəcəyi bildirilib. Həmçinin süni intellekt, robototexnika, infrastruktur texnologiyası və prefabrikasiya da daxil olmaqla, sektoru formalaşdıran ən görkəmli texnologiyalar vurğulanıb.
Dubay bələdiyyəsi, həmçinin Çin Dövlət Tikinti Mühəndisliyi Korporasiyasını modul tikinti sistemi üçün akkreditasiya edib.
