Son girovun tapılması ilə ölkə üçün travmatik dövrün əsas rəmzlərindən biri tarixə qovuşur...
Poliqon xəbər verir ki, Reuters Agentliyinin məlumatına görə, İsraildə 7 oktyabr hücumundan sonra fasiləsiz işləyən və həmin gündən keçən vaxtı göstərən simvolik saatlar 844 gündən sonra söndürüləcək. Bu qərar Qəzza zolağında hələ də tapılmamış son girovun cəsədinin aşkarlanmasından sonra verilib.
Məlumata görə, İsrail cəmiyyətində son girovun taleyinin aydınlaşması uzun müddət milli sağalma və kollektiv ağrının başa çatması üçün əsas şərt kimi görülürdü. 7 oktyabrda HƏMAS tərəfindən həyata keçirilən hücum Holokostdan bəri yəhudilərə qarşı törədilmiş ən qanlı qətliam kimi qiymətləndirilir və İsrail tarixinin ən ağır, ən sarsıdıcı hadisələrindən biri sayılır.
Həmin hücumdan sonra ölkənin müxtəlif yerlərində quraşdırılan və hücumdan keçən vaxtı saniyə-saniyə göstərən saatlar həm girovların geri qaytarılması tələbinin, həm də davam edən müharibənin simvoluna çevrilmişdi. Saatların söndürülməsi cəmiyyətdə bir mərhələnin başa çatması, eyni zamanda itkilərin rəsmi şəkildə qəbul edilməsi kimi dəyərləndirilir.
Reuters qeyd edir ki, bu hadisə eyni zamanda ABŞ prezidenti Donald Trampın müharibənin dayandırılması üzrə planının ilkin mərhələsində nəzərdə tutulan əsas elementlərdən birinin tamamlanması deməkdir. Həmin planın birinci mərhələsi girov məsələsinin bağlanmasını və humanitar vəziyyətin nisbətən sabitləşdirilməsini əhatə edirdi.
Planın ikinci mərhələsi isə Vaşinqton tərəfindən bu ayın əvvəlində elan olunub. Yeni mərhələdə əsas addımlardan biri Qəzza zolağı ilə Misir arasındakı Rəfah sərhəd-keçid məntəqəsinin açılmasıdır. Bu addımın humanitar yardımın genişləndirilməsi və regionda gərginliyin azaldılması baxımından mühüm əhəmiyyət daşıdığı bildirilir.
Poliqon.info
