Fransa Milli Assambleyası 15 yaşdan kiçik uşaqlar və yeniyetmələr üçün sosial şəbəkələrdən istifadənin qadağan edilməsini nəzərdə tutan qanun layihəsini dəstəkləyib. “Le Figaro”nun məlumatına görə, sənədi 130 deputat dəstəkləyib, 21 parlament üzvü isə əleyhinə çıxıb. İndi qanun layihəsinə Senatda baxılmalıdır — rəqəmsal texnologiyalar naziri Ann Le Enanff bunun yaxın həftələrdə baş tutacağını bildirib.
Qanun layihəsi həmçinin artıq məktəb və kolleclərdə qüvvədə olan mobil telefon istifadəsinə qadağanı da əhatə edir. Siyasətçilər bunu uşaqların zəhərli kontentdən, ekran asılılığından, təhqir və onlayn təqibdən qorunması zərurəti ilə əsaslandırırlar.
Qanun son olaraq qəbul edilərsə, Fransa sosial şəbəkələrə giriş üçün yaş həddi müəyyən edən ilk Avropa ölkəsi olacaq, deyə “Le Figaro” qeyd edir. “Uşaqlarımızın beyinləri satılmır. Nə Amerika platformalarına, nə də Çin şəbəkələrinə”, — Fransa Prezidenti Emmanuel Makron sosial şəbəkə “X”də yazıb. O, qanunun növbəti tədris ilindən qüvvəyə minməsi üçün sürətləndirilmiş prosedura israr edir.
Fransa azyaşlılar üçün rəqəmsal mühitdə icazə verilən sərhədləri müəyyənləşdirməyə ilk dəfə cəhd etmir. 2023-cü ildə hakimiyyət orqanları 15 yaşdan etibarən “rəqəmsal yetkinlik” anlayışını tətbiq etmək istəmişdi, lakin təşəbbüs Aİ qanunvericiliyi ilə ziddiyyətlər səbəbindən həyata keçməmişdi.
