Turkstan.az portalından əldə olunan məlumata əsasən, ain.az xəbər verir.
Soyuq havaların təsiri qış aylarında xüsusilə xroniki xəstəliklərdən əziyyət çəkən insanlar üçün daha ciddi problemlər yarada bilər. Mütəxəssislər bildirir ki, aşağı temperatur şəkər xəstələrinin sağlamlığına birbaşa təsir göstərərək riskləri artırır.
Həkimlərin sözlərinə görə, soyuq hava damarların daralmasına səbəb olur və bu da qan dövranını zəiflədir. Nəticədə şəkər xəstələrində xüsusilə ayaq və baldır nahiyəsinə gedən qan axını azalır, bu isə ağrı, uyuşma, soyuqluq hissi və dəridə rəng dəyişikliyi ilə müşayiət oluna bilər.
Orqanizm soyuq havada əsas həyati orqanları qorumaq üçün qanı mərkəzə yönəldir. Sağlam insanlarda bu adaptiv proses problem yaratmasa da, şəkər xəstələrində və damar daralması olan şəxslərdə ciddi fəsadlara yol aça bilər.
Mütəxəssislər vurğulayır ki, diabet xəstələrində sinir zədələnməsi – yəni neyropatiya səbəbindən ağrı və istilik hissi azalır. Bu isə xəstələrin ayaqlarında yaranan xırda yaraları, çatları və ya yanmaları gec hiss etməsinə səbəb olur. Nəticədə sadə bir zədə vaxtında müdaxilə edilmədikdə infeksiyaya, sağalmayan yaralara və ağır hallarda hətta amputasiyaya qədər gedib çıxa bilər.
Soyuq hava dərinin qurumasına və mikroskopik çatların yaranmasına şərait yaradır. Qan dövranı zəif olan şəkər xəstələrində bu çatlar tezliklə açıq yaralara çevrilə bilər. Ayaqlarda solğunlaşma və ya göyərmə müşahidə olunarsa, bu, qan dövranının kritik həddə çatdığını göstərə bilər.
Həkimlər şəkər xəstələrinə qış aylarında ayaqlarını hər gün mütəmadi yoxlamağı, isti və nəfəsalan corablardan istifadə etməyi, ayaqları birbaşa istilik mənbələrinə yaxın tutmamağı tövsiyə edirlər. Eyni zamanda, qış mövsümü öncəsi və sonrası həkim müayinələrindən keçmək, ən kiçik yaralanma zamanı belə dərhal mütəxəssisə müraciət etmək vacib sayılır.
Soyuq havalarda düzgün qorunma və vaxtında tibbi nəzarət şəkər xəstələrinin qış aylarını daha təhlükəsiz keçirməsində həlledici rol oynayır./yenisabah.az
Sonrakı hadisələr barədə daha çox məlumat almaq üçün ain.az saytını izləyin.
