Suriya Prezidenti Əhməd Şara Suriya kürdləri ilə bağlı fərmanı imzalayıb.
Ölkə.Az xairici KİV-ə istinadla xəbər verir ki, o, kürdlərin Suriya xalqının fundamental və vacib bir hissəsi olduğunu bildirib.
Suriya Prezidentliyinin 2026-cı il üçün 13-cü Fərmanına aşağıdakı maddələr daxil edildi:
Maddə (1): Suriya kürd vətəndaşları Suriya xalqının fundamental və vacib hissəsi hesab olunurlar. Onların mədəni və dil kimlikləri çoxşaxəli və vahid Suriya milli kimliyinin ayrılmaz hissəsidir.
Maddə (2): Dövlət mədəni və dil müxtəlifliyini qorumağı öhdəsinə götürür; kürd vətəndaşlarının milli suverenlik çərçivəsində irslərini, incəsənətlərini qorumaq və ana dilini inkişaf etdirmək hüququnu təmin edir.
Maddə (3): Kürd dili milli dil kimi tanınır. Kürd əhalisinin çox olduğu bölgələrdə onun tədrisinə dövlət və özəl məktəblərdə seçmə dərs kimi və ya təhsil-mədəni fəaliyyətlər çərçivəsində icazə verilir.
Maddə (4): Əl-Həsəkə əyalətində 1962-ci ildə keçirilən ümumi əhali siyahıyaalmasından irəli gələn bütün müstəsna qanunlar və tədbirlər ləğv edilir. Qeydiyyatı bağlı olanlar da daxil olmaqla, Suriya ərazisində yaşayan kürd əsilli bütün vətəndaşlara Suriya vətəndaşlığı verilir; hüquq və vəzifələrdə tam bərabərlik təmin edilir.
Maddə (5): Bahar və qardaşlığı simvolizə edən "Novruz" (21 mart) Suriya Ərəb Respublikasının bütün bölgələrində ödənişli dövlət bayramı elan edilmişdir.
Maddə (6): Dövlətin mediası və təhsil müəssisələri inklüziv milli müzakirəni qəbul etməyə borcludurlar. Etnik mənsubiyyətə və ya dilə əsaslanan bütün ayrı-seçkilik və təcrid formaları qanunla qadağandır. Milli ayrı-seçkiliyə təhrik edənlər mövcud qanunlara uyğun olaraq cəzalandırılacaqlar.
Maddə (7): Müvafiq nazirliklər və səlahiyyətli qurumlar bu fərmanın müddəalarının öz səlahiyyətləri daxilində tətbiqi ilə bağlı zəruri icra təlimatları verməlidirlər.
Maddə (8): Bu fərman rəsmi qəzetdə dərc olunduğu tarixdən qüvvəyə minəcək.
Billurə
