Çağdaş dövrümüzün əsas qlobal çağırışlarından
biri bərpaolunan enerjiyə keçiddir. Qürur hissi ilə qeyd etməliyik ki, respublikamızda
bu çağırış zamanında dəyərləndirilir, bərpaolunan və «yaşıl» enerji istehsalı ilə
bağlı müxtəlif layihələr həyata keçirilir. Bir neçə gün əvvəl “Xızı-Abşeron” Külək Elektrik Stansiyasının rəsmi açılış mərasimi keçirilməsi də göstərdi ki, Azərbaycanda bu sahədə
işlər sürətli və keyfiyyətlidir.
“Xızı-Abşeron” Külək Elektrik Stansiyası ölkəmizin
enerji potensialını gücləndirəcək, bu sahədə qarşıya qoyulan məqsədlərin təmin olunmasında böyük
töhfələr verəcək. Ən əsası, 4 il ərzində ərsəyə gələn stansiya dayanıqlı
şəkildə işləməsi ölkəmizin iqtisadi inkişafına
mühüm təkan verəcək. “Xızı-Abşeron” stansiyası
Azərbaycanın «yaşıl» enerji
siyasətinə uyğun olaraq, enerji balansını
daha davamlı edir. Külək enerjisi həm də ekoloji cəhətdən təmiz olduğundan
atmosferə karbon emissiyalarını azaldacaq və ətraf mühitə mənfi təsiri minimuma
endirəcək. Bu cür layihələr xarici investorlarla əməkdaşlığı
gücləndirir, yeni layihələrin reallaşmasına təkan verir.
Bu gün dünyadakı geosiyasi vəziyyət enerji
təhlükəsizliyinin ölkələrin milli təhlükəsizliyinin ayrılmaz hissəsi olduğunu təsdiqləyir. Azərbaycanda bu sahədə görülən işlər isə respublikamızın enerji siyasətinin
əhəmiyyətini daha da artırır.
Məlum olduğu
kimi, Azərbaycan qazının təchizat coğrafiyası genişlənməkdədir və əhatəsinə görə
Azərbaycan bu gün dünya miqyasında qabaqcıl yerlərdədir. Yaxın vaxtlarda respublikamızdan təbii qaz idxal edən dövlətlərin sayı daha
da artacaq.
Eyni zamanda ölkəmizdə
2030-cu ilə qədər elektrik enerjisinin qoyuluş gücündə bərpa olunan enerji mənbələrinin
payının 30 faizə çatdırılması hədəflənib. Yaşıl enerji mənbələrinin texniki potensialı
quruda 135 QVt, dənizdə 157 QVt-dır.
Qarabağ və Şərqi Zəngəzur, eləcə də Naxçıvan Muxtar Respublikası «yaşıl»
enerji zonası elan edilib.
Qeyd etmək lazımdır ki, ötən illər ərzində ölkəmizdə enerji sistemi
müasirləşdirilib. 2025-ci ildə
istifadəyə verilən “8 Noyabr” Elektrik Stansiyasının, habelə Qarabağ və Şərqi Zəngəzur
iqtisadi rayonlarında su elektrik stansiyalarının istismara verilməsi nəticəsində
ölkəmizdə enerjisistemin qoyuluş gücü 15.6 faiz
artıb. “8 Noyabr” Elektrik Stansiyası hesabına şərti
yanacaq sərfiyyatının kəskin aşağı düşməsilə təbii qaza qənaət etmək üçün imkan
yaranır. Prezident İlham Əliyevin də söylədiyi
kimi, Azərbaycan qazına bu gün dünya bazarlarında böyük tələbat var və nə qədər
biz daxildə təbii qaza qənaət etsək, ixrac imkanlarımız da bir o qədər artacaq.
Daha çox təbii qaza qənaət etmək
imkanı verən «yaşıl» enerji gündəliyi də Azərbaycanı enerji təhlükəsizliyi
baxımından daha cəlbedici edir. Təsadüfi deyil ki, Azərbaycanın «yaşıl» enerji gündəliyi qlobal səviyyədə təqdir
olunur. Günəş
və külək enerji
stansiyalarına aid sərmayədarlarla imzalanmış müqavilələr isə 2030-cu ilə qədər 6 qiqavat
günəş və külək enerjisi təmin etməyə imkan verəcək. İşğaldan azad olunmuş ərazilərin
potensialı hesabına növbəti beş il ərzində bərpaolunan mənbələrdən enerji
istehsalını 2 dəfə artırmaq mümkün olacaq. Beləliklə, Azərbaycanın atdığı
addımların nə dərəcədə düzgün olduğu bir daha təsdiqini tapır.
Cənab Prezident bəyan edib ki, növbəti böyük
stansiyaların açılışı Biləsuvarda, Neftçalada, Naxçıvanda, işğaldan azad
edilmiş ərazilərdə nəzərdə tutulur. Bu potensial, eyni zamanda investisiya və
müsbət proqnozu olan reytinq səviyyəsində olması xarici invertorların Azərbaycana
sərmayə yatırmaq marağını artırmaqdadır.
Könül NURULLAYEVA,
Milli Məclisin deputatı
