Moldova prezidenti Mayya Sandu, referendum keçirilsə, ölkəsinin Rumıniya ilə birləşməsinə səs verməyə hazır olduğunu söyləyib. Rumıniya NATO və Avropa İttifaqının üzvüdür, Sandu bu yolu Moldovanı xarici təzyiqlərdən qoruya biləcək potensial zəmanət kimi görür.
Hafta.az yazır ki, prezident bu fikri Britaniyanın "The Rest Is Politics" podkastına verdiyi müsahibədə bildirib. Dövlət başçısının sözlərinə görə, Moldova kimi kiçik bir ölkənin hazırkı geosiyasi mühitdə demokratiyasını və suverenliyini qoruması getdikcə çətinləşir.
Sandu dəfələrlə Moskvanın ölkənin daxili siyasətinə müdaxilə cəhdləri ilə bağlı narahatlıqlarını ifadə edib və bunu bir daha təkrarlayıb. Bununla belə, real tendensiyalar da mövcuddur. “Reuters”in məlumatına görə, 2,4 milyon əhalisi olan Moldovanın təxminən 1,5 milyon əhalisi Rumıniya vətəndaşlığına malikdir. Lakin sorğular göstərir ki, əhalinin yalnız üçdə biri birləşmə ideyasını dəstəkləyir.
