Evdə pizza hazırlayarkən ən çox rast gəlinən problemlərdən biri xəmirin çox sərt və ya quru olmasıdır.
Milli.Az xəbər verir ki, bir neçə kiçik hiylə ilə restoranlardakı kimi yumşaq və ləzzətli pizza xəmiri əldə etmək mümkündür.
Xəmirin yaxşı qabarması və yumşaq olması üçün istifadə etdiyiniz su nə çox isti, nə də çox soyuq olmalıdır. İlıq su mayanın aktivləşməsi üçün ən ideal mühitdir. Həmçinin, mayanın təsirini artırmaq üçün qarışığa bir çimdik şəkər tozu əlavə etmək xəmirin daha yaxşı "nəfəs almasını" təmin edir.
Xəmirə elastiklik və yumşaqlıq verən ən mühüm inqrediyentlərdən biri keyfiyyətli zeytun yağıdır. Zeytun yağı xəmirin daxili rütubətini qoruyur və bişərkən qurumasının qarşısını alır. Xəmiri yoğurarkən tərkibinə bir neçə xörək qaşığı zeytun yağı əlavə etməyi unutmayın.
Pizza xəmirini sadəcə qarışdırmaq kifayət deyil. Qlütenin aktivləşməsi üçün xəmiri ən azı 10-15 dəqiqə yaxşıca yoğurmalısınız. Yaxşı yoğurulmuş xəmir daha elastik olur və bişdikdən sonra sərtləşmir.
Yumşaq xəmirin ən böyük sirri səbirdir. Xəmiri yoğurduqdan sonra üzərini nəmli bir bezlə örtərək isti bir mühitdə ən azı 1-1,5 saat dincəlməyə qoyun. Xəmir iki qat böyüdükdə, o, artıq hava qabarcıqları ilə dolmuş və bişməyə hazır vəziyyətdə olur.
Pizzanı çox aşağı temperaturda uzun müddət bişirmək xəmirin qurumasına səbəb olur. Sobanızı əvvəlcədən ən yüksək dərəcəyə (məsələn, 220-250°C) qədər qızdırın. Yüksək temperaturda qısa müddət ərzində bişən pizzanın kənarları çıtır, daxili isə pambıq kimi yumşaq qalacaq.
Xəmirin üzərinə çəkdiyiniz tomat sousu çox qatı olmamalıdır. Sousun tərkibindəki rütubət bişmə zamanı xəmirin üst qatının yumşaq qalmasına kömək edir.
Lalə Qüdrətova
Milli.Az
