Türkiyə Prezidenti Rəcəb Tayyib Ərdoğan gənclərin məşğulluğunu və gəlirlərini artırmağa yönəlmiş bir neçə yeni dövlət proqramının icrasına start verildiyini elan edib. Bu təşəbbüslər həm dövlət, həm də özəl sektorun iştirakı ilə həyata keçiriləcək.
Əsas layihələrdən biri “İlk addım” proqramıdır. Proqram çərçivəsində dövlət 18–25 yaş arası gənclərin işə qəbulundan sonra ilk 6 ay ərzində onların əməkhaqqını kompensasiya edəcək. Bu addım şirkətləri gənc mütəxəssisləri işə götürməyə daha çox həvəsləndirmək məqsədi daşıyır.
“Gənclər proqramı” çərçivəsində isə gündəlik cib xərcləri artırılıb. Belə ki, ödənişlər 1 083 lirədən 1 375 lirəyə yüksəldilib. Həftədə 3 gün və daha çox işləyən iştirakçılar ayda 19 min lirəyə qədər gəlir əldə edə biləcəklər.
Bundan əlavə, “Güc” proqramına növbəti üç il ərzində 445 milyard türk lirəsi vəsait ayrılması planlaşdırılır. Gözləntilərə görə, bu proqram 3 milyondan çox gənc üçün yeni iş yerlərinin yaradılmasına imkan verəcək.
Türkiyə hakimiyyəti bildirir ki, yeni proqramlar ölkənin sosial-iqtisadi potensialının gücləndirilməsinə və gənclərin dövlətin inkişafında rolunun artırılmasına xidmət edir.
