Astana, 8 yanvar, AZƏRTAC
Qazaxıstan Respublikası 2026-cı ildə Türk Ticarət və Sənaye Palataları Birliyinin (TCCI) sədrliyini öz üzərinə götürüb.
AZƏRTAC “Kazinform”a istinadla xəbər verir ki, bu barədə təşkilatın Baş Assambleyasında məlumat verilib.
2026-cı ildə TCCI-yə sədrliyi dövründə Qazaxıstan sənaye əməkdaşlığı sahəsində praktik layihələrin həyata keçirilməsinə, birgə layihələr portfelinin qurulmasına və Orta Dəhliz və “Şimal-Cənub” dəhlizi də daxil olmaqla nəqliyyat və logistika dəhlizlərinin inkişafına diqqət yetirməyi planlaşdırır.
Raimbek Batalov 2026-cı il üçün bir il müddətinə Türk Ticarət və Sənaye Palatasının (TCCI) prezidenti təyin edilib. Onun sözlərinə görə, türk istiqaməti Qazaxıstanın xarici iqtisadiyyatda prioritetlərindən biridir.
“Vurğulamaq vacibdir ki, bu dinamika daha yüksək əlavə dəyərli məhsulların tədarükünün genişlənməsi ilə əlaqədardır. Taxıl, neft-kimya məhsulları, qida məhsulları və emal olunmuş materialların ixracı əhəmiyyətli dərəcədə artıb. Bu, sadə ticarətdən daha mürəkkəb sənaye və aqrar-sənaye əməliyyatları formalarına keçidi və birgə istehsal zəncirləri üçün təməllərin yaradılmasını göstərir”, - deyə Batalov qeyd edib.
2025-ci ilin yanvar-oktyabr aylarının sonuna qarşılıqlı ticarət dövriyyəsi ötən ilin eyni dövrü ilə müqayisədə 10%-dən çox artımla 11 milyard dollara çatıb. Qazaxıstanın ixracı 16,6% artaraq 7,9 milyard dollara çatıb.
Xatırladaq ki, Türk Ticarət və Sənaye Palataları Birliyi 2019-cu ildə yaradılıb. Onun əsas məqsədi türk ölkələri arasında iqtisadi əməkdaşlığı inkişaf etdirməkdir. Birliyə Azərbaycan, Qazaxıstan, Qırğızıstan, Türkiyə, Özbəkistan, Türkmənistan və Macarıstan daxildir. Türk iqtisadi məkanı hazırda 180 milyondan çox insanı əhatə edir.
Elşən Rüstəmov
AZƏRTAC-ın xüsusi müxbiri
Astana
