Yuta ştatının paytaxtında silahlı insident nəticəsində daha azı altı nəfər yaralanıb...
Poliqon xəbər verir ki, ABŞ-nin Yuta ştatının paytaxtı Solt-Leyk-Sitidə Redwood Road küçəsində yerləşən kilsə binasının yaxınlığında baş verən atışma nəticəsində iki nəfər həyatını itirib. Daha azı altı nəfər müxtəlif dərəcəli xəsarətlər alıb. Bu barədə şəhər polis idarəsi Facebook sosial şəbəkəsində məlumat yayıb.
Polisin açıqlamasına görə, atışma nəticəsində yaralananlardan üç nəfərin vəziyyəti kritik qiymətləndirilir. Hazırda hadisəni törətməkdə şübhəli bilinən şəxslər müəyyən edilməyib. Hüquq-mühafizə orqanları genişmiqyaslı istintaqa başlayıb və rəsmi məlumata əsasən, polis əməkdaşlarının “ciddi ipucları” mövcuddur.
Şəhər polis rəisi Brayan Redd bildirib ki, ilkin qiymətləndirmələrə əsasən, insidentin dini icmaya qarşı məqsədli hücum olduğu ehtimal edilmir. Onun sözlərinə görə, hüquq-mühafizə orqanları hazırda kilsənin arxa hissəsi də daxil olmaqla ətraf ərazini diqqətlə yoxlayır.
ABC News-un polis mənbələrinə istinadla yazdığına görə, atışmada şimal istiqamətində Redwood Road boyunca hərəkət edən avtomobilin iştirak etmiş ola biləcəyi ehtimal olunur. Hazırda bu versiya üzrə araşdırmalar davam etdirilir, sakinlərdən isə ehtiyatlı olmaları və hər hansı məlumatı dərhal polisə bildirmələri xahiş olunur.
Poliqon.info
