Razer şirkəti CES 2026 sərgisində Project Motoko adlı konseptual cihazını təqdim edib. Yeni qurğu qulaqlıq, ağıllı eynək və süni intellekt köməkçisinin hibridi kimi hazırlanıb.
Qualcomm Snapdragon prosessoru ilə təchiz olunan Project Motoko ön hissədə yerləşdirilən iki kamera vasitəsilə ətraf mühiti real vaxt rejimində analiz edir. Sistem obyektləri və mətni tanıya, yazıları tərcümə edə və istifadəçiyə kontekstual məlumatlar təqdim edə bilir. Bu imkanlar oyun prosesi zamanı da aktiv şəkildə istifadə oluna bilər.
Cihaz ChatGPT, Gemini və Grok kimi məşhur süni intellekt modelləri ilə inteqrasiya dəstəyi verir və əsasən səsli əmrlərlə idarə olunur. Razer ilkin mərhələdə yalnız tərtibatçılar üçün xüsusi dəst buraxmağı planlaşdırır.
Şirkət Project Motoko-nun geyilə bilən süni intellekt cihazları sahəsində strateji baxışını əks etdirdiyini bildirir. Kommersiya versiyasının çıxış tarixi və qiyməti hələ açıqlanmayıb.
