Zamanın aynasında elə anlar həkk olunur ki, onlar sadəcə tarixin soyuq yaddaşına deyil, bir millətin yenidən doğuluş dastanına çevrilir. Prezident İlham Əliyevin yerli televiziya kanallarına verdiyi son müsahibəsini dinləyərkən insan bir daha dərk edir ki, bu kəlamlar sadəcə bir dövlət rəhbərinin nitqi deyil; bu, otuz illik həsrətin vüsala qovuşan sədası, "Dəmir Yumruğ"un daş üzərində yazdığı əbədi ədalət bəyannaməsidir. Biz dünyaya sübut etdik ki, haqqın hayqırtısı qarşısında heç bir küy dayana bilməz. Artıq torpaq bizim üçün bir nisgil, bir sızıltı deyil. Müzəffər Ali Baş Komandanın o dərin, səmimi sözləri hər birimizin ruhuna sığal çəkir: “Artıq o zədəli, yaralı torpaq anlayışı yoxdur. İndi torpaq deyəndə, mən daha çox torpağın keyfiyyətinə baxıram... Çünki artıq sülh dövrüdür, quruculuq dövrüdür”. Bu ifadələrdə barıt qoxulu savaşın bitdiyi, yerini zərif çiçəklərin və bərəkətli zəmilərin tutduğu cənnət bir Vətən mənzərəsi var.

Sözün ən uca məqamı isə ana dilimizə — mənəvi sərhədimizə göstərilən o müqəddəs ehtiramda ucaldı. Dil bizim ruhumuzun nəfəsi, varlığımızın qibləgahıdır. Prezidentin Azərbaycan dilini dövlətçiliyimizin sarsılmaz sütunu adlandırması, hər birimizə ulu babalarımızdan gələn müqəddəs vəsiyyətin təzələnməsi idi: “Dil o amildir ki, milləti millət edir... Dil əldən gidəndən sonra, yaxud da ki, pozulandan sonra onda milli kimlik də gedəcək, ondan sonra dövlətçilik də gedəcək”. Bu, bir rəhbərin xalqına mənəvi andıdır: Dilini qoru ki, varlığın əbədi olsun! Çünki biz dünyadakı 50 milyonluq nəhəng bir ailənin döyünən ürəyiyik və bu ürək Bakıdan gələn o təmiz, o saf ana dili sədası ilə həyat tapır.

Bu müsahibə həm də gələcəyin rəngarəng tablosudur. Azərbaycan artıq sadəcə “qara qızılın” parıltısı ilə deyil, insan zəkasının, elmin və ən müasir texnologiyaların nuru ilə sabaha boylanır. Süni intellektin rəqəmsal dünyası ilə qədim tariximizin möhtəşəm vəhdəti dövlətimizin yeni simasını yaradır. Lakin bu texnoloji sıçrayışın mərkəzində yenə də uca Azərbaycan vətəndaşı — şəhidinin xatirəsini müqəddəs tutan, qazisinin haqqını namus borcu sayan ulu bir ruh dayanır. Dövlət başçısının etimadı doğrultmayanlara qarşı o qətiyyətli baxışı, məmur özbaşınalığına qarşı göstərdiyi sarsılmaz iradə, təmiz və ləyaqətli bir cəmiyyət qurmaq eşqimizin ən böyük təminatıdır.

Bizim bu yeni yolumuz təkcə sərhədlərimiz daxilində deyil, bütün geniş coğrafiyamızda əks-səda doğurur. Azərbaycan bu gün təkcə öz taleyini deyil, həm də Türk dünyasının bütövlüyünü və gələcək birliyini tərənnüm edən bir məşəldir. Prezidentin müsahibədə xüsusi vurğuladığı regional əməkdaşlıq formatları, xüsusilə Mərkəzi Asiya ilə qurulan o sarsılmaz bağlar, Xəzəri keçib Zəngəzurdan süzülərək Anadoluya qovuşan Türkün ortaq yolu bizim strateji zəfərimizin üfüqləridir. Artıq dünya dərk edir ki, rəsmi Bakı sadəcə enerji xətlərinin deyil, həm də qəlblərin və mədəniyyətlərin birləşdiyi mərkəzdir. Bu birliyin gücü ilə biz tarixi coğrafiyamızı bir daha sülhün, rifahın və qardaşlığın vətəninə çeviririk; elə bir vətən ki, orada hər bir uğurumuz Turan ellərinin ortaq sevincinə, hər bir kəlməmiz isə yeni dünya nizamının ədalət sədasına çevrilir.

İndi bütöv Azərbaycanın hər daşı, hər qayası qürurla pıçıldayır. Xankəndidə qürurla dalğalanan bayrağımız, Zəngəzur dəhlizi ilə dünyaya açılan pəncərəmiz və Türk dünyasının polad birliyi bizim sarsılmaz qalamızdır. Heç vaxt, bir daha bu torpaqlara naməhrəm əli dəyməyəcək! Çünki önümüzdə dünyanı öz haqqı ilə heyran qoyan uzaqgörən bir Sərkərdə, arxasında isə bir yumruq kimi birləşmiş polad iradəli bir xalq var. Bu müsahibə Azərbaycanın əbədi müstəqilliyinin nəğməsi, sarsılmaz birliyimizin sədası və parlaq sabahımızın zəfər nidasıdır.
Ucalığın mübarək, Müzəffər Azərbaycan!

• Söz
• Dil
• Mənəvi Sərhəd
• Müqəddəs Ehtiram