Maçado Nikolas Maduronun ABŞ tərəfindən ələ keçirilməsini ölkəsi üçün dönüş nöqtəsi adlandırıb...
Poliqon xəbər verir ki, Venesuela müxalifətinin lideri Mariya Korina Maçado yaxın vaxtlarda ölkəyə qayıtmaq və azad, ədalətli seçkilərin keçirilməsi uğrunda mübarizə aparmaq niyyətində olduğunu açıqlayıb. O, Nikolas Maduronun ABŞ tərəfindən ələ keçirilməsini Venesuela üçün həlledici dönüş nöqtəsi kimi qiymətləndirib.
Maçado Fox News telekanalına müsahibəsində bildirib ki, müxalifət 2024-cü il seçkilərində genişmiqyaslı saxtakarlıqlara baxmayaraq, faktiki olaraq inandırıcı qələbə qazanıb. Onun sözlərinə görə, əgər ölkədə həqiqətən dürüst səsvermə keçirilsəydi, müxalifət seçicilərin 90 faizdən çoxunun dəstəyini əldə edərdi.
Bununla yanaşı, ABŞ prezidenti Donald Trampın mövqeyi müxalifət düşərgəsində narazılıq yaradıb. Tramp administrasiyası hələlik Vaşinqtonun müvəqqəti prezident kimi tanıdığı Delsi Rodriges və əvvəlki rejimin bəzi nümayəndələri ilə əməkdaşlığa üstünlük verdiyini açıq şəkildə göstərib. Ağ Ev hesab edir ki, ölkədə vəziyyət sabitləşmədən dərhal seçkilərin keçirilməsi real deyil.
Bu yanaşma Venesuela müxalifətinin sıralarında və xaricdə yaşayan venesuelalı diaspor nümayəndələri arasında məyusluqla qarşılanıb. Onlar ABŞ-nin mövqeyinin demokratik dəyişikliklər prosesini ləngidə biləcəyindən narahat olduqlarını bildiriblər.
Mariya Korina Maçado Delsi Rodrigesi sərt tənqid edərək onu repressiyaların, korrupsiyanın və narkotik ticarətinin əsas memarlarından biri adlandırıb. O, Rodrigesi eyni zamanda Rusiya, Çin və İranla sıx əlaqələrdə ittiham edib və bu qüvvələrlə ittifaqda Venesuelanı böhrana sürükləməkdə günahlandırıb.
Buna baxmayaraq, mənbələr bildirir ki, ABŞ kəşfiyyat strukturları keçid dövründə nizam-intizamın və dövlət institutlarının qorunması baxımından Delsi Rodriges və köhnə rejimin digər bəzi məmurlarını ən real seçim kimi nəzərdən keçirir. Analitiklərin fikrincə, bu yanaşma Venesuelada demokratik dəyişikliklərə gedən yolun mürəkkəb və ziddiyyətli olacağını göstərir.
Poliqon.info
