Astana, 4 yanvar, AZƏRTAC
Qazaxıstan Respublikası Səhiyyə Nazirliyi sosial mediada guya “uşaqlarda xəstəliyə səbəb olan ucuz vaksinlərin alınması” barədə yayılan məlumatları rəsmi olaraq təkzib edib.
AZƏRTAC xəbər verir ki, nazirliyin məlumatında Qazaxıstan Respublikasında Milli profilaktik peyvəndlər Təqvimi çərçivəsində istifadə edilən bütün vaksinlərin çoxmərhələli beynəlxalq və milli ekspertizadan keçirildiyi bildirilir.
Qeyd olunur ki, vaksin preparatları dövlət qeydiyyatına alınıb və Ümumdünya Səhiyyə Təşkilatının tələblərinə və milli qanunvericilik normalarına ciddi şəkildə uyğun olaraq istifadəyə təsdiq edilib.
Nazirlik vurğulayıb ki, ixtisaslaşmış tibbi ixtisası olmayan şəxslər tərəfindən bu cür iddiaların yayılması valideynləri çaşdırır, səhiyyə sisteminə etibarı sarsıdır və uşaqların sağlamlığı üçün real təhlükə yaradır.
Elşən Rüstəmov
AZƏRTAC-ın xüsusi müxbiri
Astana
